និយោជិកជាង ១០០,០០០ នាក់នៅក្នុងប្រទេសថៃបានបាត់បង់ការងារ ឬ ត្រូវបានផ្អាកពីការងារ ខណៈដែលអាជីវកម្មជាង ៦,០០០ នៅក្នុងខេត្តចំនួន ២៨ បានបិទទ្វារ បន្ទាប់ពីមានការផ្ទុះឡើងនៃវីរុស COVID-19 ថ្មី។ រដ្ឋមន្ត្រីក្រសួងការងារថៃលោក Suchart Chomklin បាននិយាយថា ការធានារ៉ាប់រងកម្មករដែលគ្មានការងារធ្វើដោយសារជំងឺរាតត្បាត អាចចាប់ផ្តើមដាក់ពាក្យសុំប្រាក់សំណងបានហើយ គឺចាប់ពីថ្ងៃទី ៤ ខែមករាតទៅ។ លោកបានបន្ថែមថា ប្រព័ន្ធទូទាត់ត្រូវបានធ្វើឱ្យប្រសើរឡើង ដើម្បីធានាថា និយោជិក ទទួលបានសំណងឆាប់រហ័សជាងការផ្ទុះឡើងនៃវីរុសលើកដំបូងនៅដើមឆ្នាំមុន។

គួរឲ្យដឹងថា បច្ចុប្បន្នអាជ្ញាធរថៃ និងបុគ្គលិកសុខាភិបាលកំពុងព្យាយាមយ៉ាងខ្លាំង ដើម្បីទប់ស្កាត់ការរីករាលដាលនៃរលកថ្មីនៃការឆ្លងក្នុងតំបន់។ ជាមួយគ្នានេះនាយករដ្ឋមន្រ្តី ប្រាយុធ ចានអូចា បានដាក់កម្រិតថ្មីលើសកម្មភាពអាជីវកម្ម និងការប្រមូលផ្ដុំនៅទីក្រុងបាងកក និងខេត្តចំនួន ២៧ ដែលរងផលប៉ះពាល់ខ្លាំងបំផុតចាប់ពីថ្ងៃទី ៤ ខែមករាដើម្បីទប់ស្កាត់ការផ្ទុះឡើង។

គណៈកម្មាធិការអចិន្រ្តៃយ៍រួមគ្នាស្តីពីពាណិជ្ជកម្មឧស្សាហកម្ម និងធនាគារ (JSCCIB) គ្រោងនឹងវាយតម្លៃទស្សនវិស័យសេដ្ឋកិច្ចរបស់ប្រទេសថៃនៅឆ្នាំ២០២១ ខណៈដែលវិធានការណ៍របស់រដ្ឋកាន់តែខ្លាំងប្រឆាំងនឹងការផ្ទុះឡើងថ្មីបានចាប់ផ្តើមប៉ះពាល់ដល់ការងារនៅក្នុងខេត្តដែលមានហានិភ័យ។ ជាក់ស្ដែងការកើនឡើងនៃការឆ្លងមេរោគប្រចាំថ្ងៃចាប់តាំងពីចុងឆ្នាំមុនដោយមានករណីថ្មីចំនួន ៧៤៥ ករណីនៅថ្ងៃទី ៤ ខែមករាបានបង្ហាញថា វិស័យជំនួញជាច្រើនជាពិសេសភោជនីយដ្ឋានកំពុងរងទុក្ខ។

លោក Supant Mongkolsuthree ប្រធានសហព័ន្ធឧស្សាហកម្មថៃ (FTI) បានមានប្រសាសន៍ថា ស្ថានភាពនេះបានជម្រុញឱ្យ JSCCIB ពិចារណាឡើងវិញពីផលប៉ះពាល់នៃជំងឺរាតត្បាតលើសេដ្ឋកិច្ច។ ដោយកាលពីខែមុន JSCCIB បាននិយាយថា ខ្លួនរំពឹងថានឹងមានទស្សនវិស័យសេដ្ឋកិច្ចប្រសើរជាងមុននៅក្នុងឆ្នាំ២០២១ ដោយការនាំចេញបានកើនឡើង ៣-៥% ផលិតផលក្នុងស្រុកសរុបកើនឡើង ២-៤% និងអតិផរណាត្រូវបានរក្សានៅ ០.៨-១.២%។ គួរបញ្ជាក់ផងដែរថា គិតត្រឹមថ្ងៃទី៤ ខែមករា ចំនួនអ្នកឆ្លង Covid-19 សរុបនៅក្នុងប្រទេសថៃមានចំនួន ៨,៨៣៩ នាក់ ក្នុងនោះចំនួនអ្នកស្លាប់មាន ៦៥ នាក់៕

អត្ថបទ៖ លីនី
ប្រភព៖ vietnamplus