ក្រសួងសាធារណការ និងដឹកជញ្ជូន បានអះអាងថា គិតត្រឹមដំណាច់ខែវិច្ឆិកាកន្លងទៅនេះ ការស្ថាបនាឡើងវិញ នូវកំណាត់ផ្លូវជាតិលេខ៣ ចាប់ពីរង្វង់មូលចោមចៅ ដល់ ក្រុងកំពត ប្រវែងប្រមាណ១៣៤ គីឡូម៉ែត្រ សម្រេចបាន ៨៣ភាគរយហើយ។ យោងតាមសេចក្តីជូនដំណឹងនៅព្រឹកថ្ងៃទី១០ ខែធ្នូនេះកន្លងទៅនេះ បានបញ្ជាក់ថា ផ្លូវនេះត្រូវបានស្ថាបនាជាប្រភេទផ្លូវ បេតុងកៅស៊ូ(AC) បែងចែកជាពីរដំណាក់កាល ដែលដំណាក់កាលទីមួយ ពីចោមចៅ-បែកគូស ត្រូវបានពង្រីក ពីពីរគន្លងទៅបួនគន្លង និងមានសួនច្បារកណ្តាលទ្រូងផ្លូវ និងដំណាក់កាលទីពីរ ពីបែកគូសទៅក្រុងកំពត សាងសង់មួយគន្លងទៅមួយគន្លងមក ដោយគ្រោងបញ្ចប់ការសាងសង់នៅពាក់កណ្តាលឆ្នាំ២០២២ខាងមុខ។

កំណាត់ផ្លូវជាតិលេខ៣ ពីរង្វង់មូលចោមចៅ ដល់ក្រុងកំពត បានបើកការដ្ឋានស្ថាបនាសាងសង់កាលពីថ្ងៃទី៧ ខែឧសភា ឆ្នាំ២០១៨ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា។ ឯកឧត្តម ទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានបញ្ជាក់ថា ផ្លូវជាតិលេខ៣ ចាប់ពីរង្វង់មូលចោមចៅទៅដល់ខេត្តកំពត មានកន្លែងដាក់កាម៉េរាសុវត្ថិភាព ដើម្បីចាប់យានយន្តបើកបរលើសល្បឿន កំណត់ចំនួន១០កន្លែង ព្រមទាំងគ្រោងសាងសង់ផ្លូវអាកាសមួយកន្លែង នៅម្តុំផ្សារត្រាំខ្នា ដើម្បីសម្រួលការធ្វើដំណើរឆ្លងកាត់ របស់ប្រជាពលរដ្ឋពីគ្រោះថ្នាក់ចរាចរណ៍ និងការកកស្ទះ។

សូមជម្រាបផងដែរថា ផ្លូវជាតិលេខ៣នេះ ត្រូវបានរាជរដ្ឋាភិបាល ផ្តល់សិទ្ធិសាងសង់ដោយក្រុមហ៊ុនសាជីវកម្មស្ពាន និងថ្នល់ចិន (China Road and Bridge Corporation) និងត្រួតពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេសសំណង់ក្វាងចូវ វ៉ានអាន (Guangzhou Wanan Construction Supervision Co., Ltd) ក្នុងគម្រោងចំណាយថវិកាសរុបប្រមាណ ២១៩,៩១១លានដុល្លារអាមេរិក ជាហិរញ្ញប្បទានសម្បទានពីសាធារណរដ្ឋប្រជាមានិតចិន និងថវិកាបដិភាគរបស់រាជរដ្ឋាភិបាលកម្ពុជា៕

ប្រភព៖ ក្រសួងព័ត៌មាន