រដ្ឋាភិបាលសហរដ្ឋអាមេរិក និង​អ្នកផលិតសម្លៀកបំពាក់អាមេរិកបានសន្យាជួយកម្មករ កម្មការិនីដែលបម្រើការ​ក្នុងវិស័យកាត់ដេរ និងវាយនភ័ណ្ឌនៅអាស៊ីឲ្យងើបឡើងវិញពីភាពលំបាកផ្នែកសេដ្ឋកិច្ចដែលវាយប្រហារដោយជំងឺ Covid-19។ ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) និងតំណាងឧស្សាហកម្មបានចុះហត្ថលេខាលើអនុស្សរណៈនៃការយោគយល់គ្នាកាលពីថ្ងៃទី ២៨ ខែតុលាដោយបានសន្យាថា នឹងស្វែងរកវិធីដើម្បីជួយកម្មករដែលផ្គត់ផ្គង់ក្រុមហ៊ុនសម្លៀកបំពាក់ និងស្បែកជើងរបស់សហរដ្ឋអាមេរិក។

ក្នុងរយៈពេលមួយឆ្នាំទៀតភាពជាដៃគូនេះ នឹងជួយដល់វាយនភ័ណ្ឌ ភាគច្រើននៃប្រទេសបង់ក្លាដែស កម្ពុជា ស្រីលង្កា និងប្រទេសវៀតណាមដែលភាគច្រើនបានបាត់បង់ការងារដោយសារជំងឺរាតត្បាត។ ជាមួយគ្នានេះ​ ទីភ្នាក់ងារ (USAID) បាននិយាយថា៖ «ជាមួយនឹងល្បឿន និងទំហំមិនធ្លាប់មានពីមុនជំងឺរាតត្បាតរ៉ាំរ៉ៃ (COVID-19) បានជះឥទ្ធិពលយ៉ាងធ្ងន់ធ្ងរដល់បណ្តាញផ្គត់ផ្គង់ពិភពលោក ដែលរំខានដល់ពាណិជ្ជកម្ម និងការវិនិយោគធ្វើឱ្យកម្មករជួរមុខប្រឈមនឹងហានិភ័យ និងបំបាត់ការងាររបស់កម្មកររាប់លាននាក់ផ្សេងទៀតជាពិសេសស្ត្រី។

ការប្តេជ្ញាចិត្តនេះ គឺជាផ្នែកមួយនៃកិច្ចខិតខំប្រឹងប្រែងរបស់សហរដ្ឋអាមេរិកក្នុងការជំរុញការងើបឡើងវិញនៃសេដ្ឋកិច្ចសកលលោកក្នុងកំឡុងពេល និងបន្ទាប់ពីការរីករាលដាលនៃជំងឺរាតត្បាត covid-19 ។ ក្រសួងការបរទេសសហរដ្ឋអាមេរិកបានដាក់ចេញនូវយុទ្ធសាស្ត្រដើម្បីជំរុញសេដ្ឋកិច្ចពិភពលោកតាមរយៈការស្តារទំនុកចិត្តលើការធ្វើដំណើរ ការដឹកជញ្ជូន និងពាណិជ្ជកម្មអន្តរជាតិប្រកបដោយសុវត្ថិភាព។ ទន្ទឹមនឹងនេះទីភ្នាក់ងារ USAID បានធ្វើការពិនិត្យយុទ្ធសាស្ត្រដើម្បីកំណត់វិធីដែលល្អបំផុតដើម្បីជួយរដ្ឋាភិបាលនិងដៃគូអន្តរជាតិជំនះភាពលំបាកផ្នែកសេដ្ឋកិច្ចនិងមនុស្សធម៌ដែលបណ្តាលមកពីជំងឺរាតត្បាត។

គួរបញ្ជាក់ផងដែរថា រដ្ឋាភិបាលសហរដ្ឋអាមេរិក និងមន្រ្តីផ្នែកឯកជនបានចុះហត្ថលេខាលើអនុស្សរណៈយោគយល់គ្នានៅវេទិកាធុរកិច្ចឥណ្ឌូ-ប៉ាស៊ីហ្វិកនៅទីក្រុងហាណូយ។ រដ្ឋាភិបាលសហរដ្ឋអាមេរិកធ្វើជាម្ចាស់ផ្ទះនៃវេទិកានេះ ជាមួយប្រទេសវៀតណាមដែលជាផ្នែកមួយនៃការប្តេជ្ញាចិត្តដ៏យូរអង្វែងរបស់សហរដ្ឋអាមេរិកចំពោះកំណើនសេដ្ឋកិច្ចនៅក្នុងតំបន់។ នាពេលនោះក្រុមហ៊ុន និងសមាគមពាណិជ្ជកម្មដែលបានចុះហត្ថលេខាលើកិច្ចព្រមព្រៀងនេះរួមមាន៖ ក្រុមហ៊ុន Carter’s Inc, Gap, Global Brands Group, Levi Strauss និងក្រុមហ៊ុន, ក្រុមហ៊ុន Nike, Tapestry, Target, VF Corporation, Walmart, សមាគមសម្លៀកបំពាក់ និងស្បែកជើងអាមេរិក, សហព័ន្ធលក់រាយជាតិ, សហព័ន្ធ សមាគមឧស្សាហកម្មលក់រាយ និងសមាគមឧស្សាហកម្មម៉ូតសហរដ្ឋអាមេរិក៕

អត្ថបទ៖ លីនី
ប្រភព៖ sharemerica