យោងតាមការចេញផ្សាយរបស់ទូរទស្សន៍ NHK បានដឹងថារដ្ឋាភិបាលទីក្រុងតូក្យូត្រូវបានគេរំពឹងថា នឹងចំណាយមួយផ្នែកធំបំផុតនៃការចំណាយបន្ថែមសម្រាប់ព្រឹត្តិការណ៍អូឡាំពិក និងប៉ារ៉ាឡាំពិកនៅឆ្នាំក្រោយ។ ដោយការចំណាយបន្ថែមនេះ ត្រូវបានចែករំលែកឲ្យដឹងដោយរដ្ឋាភិបាលទីក្រុង រដ្ឋាភិបាលកណ្តាល និងគណៈកម្មាធិការរៀបចំការប្រកួតនេះ។ ប្រភពបានឲ្យដឹងថា ការចំណាយបន្ថែមត្រូវបានប៉ាន់ប្រមាណថាមានចំនួនសរុប ៣០០ ពាន់លានយ៉េន ឬ ប្រហែល ២.៩ ពាន់លានដុល្លារ ដោយរាប់បញ្ចូលទាំងការចំណាយទាក់ទងនឹងការពន្យារពេលនៃហ្គេមទៅរដូវក្តៅក្រោយ និងវិធានការដើម្បីការពារការឆ្លងមេរោគ។

ជាមួយគ្នានេះដែរ ចំពោះការចំណាយលើការពន្យាពេលប្រហែល ១.០៦ ពាន់លានដុល្លារ អាចត្រូវបានរៀបចំដោយគណៈកម្មាធិការរៀបចំដែលប្រហែល ៧៧០ លានដុល្លារដោយរដ្ឋាភិបាលក្រុង និងប្រហែល ១៤៤ លានដុល្លារដោយរដ្ឋាភិបាលកណ្តាល។ ដោយឡែកទាក់ទងនឹងការចំណាយសម្រាប់វិធានការណ៍ប្រឆាំងនឹងរោគឆ្លងនេះមានប្រហែលជា ៥៣០ លានដុល្លារអាចត្រូវបានផ្តល់ដោយរដ្ឋាភិបាលកណ្តាល និងប្រហែល ៣៨៥ លានដុល្លារដោយរដ្ឋាភិបាលទីក្រុង ដោយគណៈកម្មាធិការរៀបចំនេះទំនងជាមិនមានបន្ទុកហិរញ្ញវត្ថុនៅក្នុងប្រភេទនេះទេ។

និយាយជារួមប្រហែល ១,១៥ ពាន់លានដុល្លារអាចនឹងត្រូវបានផ្តល់ឱ្យដោយរដ្ឋាភិបាលក្រុងប្រមាណជា ១,០៦ ពាន់លានដុល្លារដោយគណៈកម្មាធិការរៀបចំ និងប្រហែល ៦៧៣ លានដុល្លារដោយរដ្ឋាភិបាលកណ្តាល។ យ៉ាងណាមិញភាគីទាំងបីត្រូវបានគេរំពឹងថានឹងឈានដល់កិច្ចព្រមព្រៀងដ៏ទូលំទូលាយមួយស្តីពីភាគហ៊ុនរបស់ពួកគេនៃការចំណាយបន្ថែមនៅថ្ងៃសុក្រ៕

អត្ថបទ៖ លីនី
ប្រភព៖ nhk