ពូជស្រូវស្រាលមិនប្រកាន់រដូវប្រមាណ ៦ពាន់តោន និងដំណាំរួមផ្សំជិត ៥៦ ម៉ឺនកញ្ចប់របស់រាជរដ្ឋាភិបាលត្រូវបានផ្ដល់ដល់ប្រជាកសិករតាមបណ្ដារាជធានី-ខេត្ត ដែលរងគ្រោះដោយជំនន់ទឹកភ្លៀង ដើម្បីស្ដារឡើងវិញនូវដំណាំស្រូវ និងដំណាំរួមផ្សំដែលខូចខាតនាពេលកន្លងមកនោះ។ នៅលើផេកផ្លូវការរបស់គណៈកម្មាធិការជាតិគ្រប់គ្រងគ្រោះមហន្តរាយបានសរសេរថា កាលពីថ្ងៃ ៧កើត ខែមិគសិរ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃអាទិត្យ ទី ២២ ខែវិច្ឆិកា ឆ្នាំ២០២០ ឯកឧត្តម ទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយបានបន្តចុះពិនិត្យវឌ្ឍនភាពនៃការងារបង្កបង្កើនផលការស្តារស្រូវឡើងវិញ និងជួបសំណេះសំណាលជាមួយបងប្អូនប្រជាកសិករក្នុងខេត្តពោធិ៍សាត់ និងខេត្តកំពង់ធំ។ គ្រោះទឹកជំនន់នៅក្នុងឆ្នាំនេះ បានធ្វើឱ្យប៉ះពាល់ស្រូវប្រជាពលរដ្ឋជាច្រើនហិកតា។
សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញវិធានការបន្ទាន់ជំរុញការធ្វើស្រែ និងដាំដុះឡើងវិញរបស់ប្រជាពលរដ្ឋក្នុងបំណងជួយស្តារជីវភាពរបស់ពួកគាត់ និងចៀសវាងការខ្វះស្បៀងអាហារ។ គិតត្រឹមថ្ងៃទី ១៥ ខែវិច្ឆិកា កន្លងទៅនេះ ពូជស្រូវស្រាលមិនប្រកាន់រដូវប្រមាណ ៦ពាន់តោន និងដំណាំរួមផ្សំជិត ៥៦ម៉ឺនកញ្ចប់ ត្រូវបានចែកជូនប្រជាកសិករក្រោយពេលជំនន់ទឹកភ្លៀងបានស្រកទៅវិញ។
បន្ថែមពីលើនោះ សម្តេចតេជោក៏បានបញ្ចេញគ្រឿងចក្រកសិកម្ម និងម៉ាស៊ីនព្រោះស្រូវជាដើម ជួយអន្តរាគមន៍លើការធ្វើស្រែឡើងវិញផងដែរ។ បច្ចុប្បន្ន ប្រជាពលរដ្ឋបាន និងកំពុងធ្វើសកម្មភាពយ៉ាងសកម្មក្នុងការដាំដុះឡើងវិញនេះ។ របាយការណ៍បានបង្ហាញថា ការងារធ្វើស្រែឡើងវិញនៅក្នុងខេត្តបាត់ដំបង និងខេត្តបន្ទាយមានជ័យសម្រេចបានលទ្ធផលប្រមាណជាង ៥០% ខេត្តកំពង់ធំសម្រេចបាន ប្រមាណ ៨៥% និងខេត្តពោធិ៍សាត់សម្រេចបានជាង ៣៤% ។
ខេត្តបាត់ដំបង ធ្វើស្រែបាន ៥,៨៣១ ហិកតាលើផ្ទៃដីដែលអាចស្តារឡើងវិញបានចំនួន ១០,៥០០ហិកតា ខេត្តបន្ទាយមានជ័យបាន ៥,១១៣ហិកតា លើផ្ទៃដីអាចស្តារឡើងវិញ ចំនួន ១១,១៦៩ហិកតា ខេត្តកំពង់ធំផ្ទៃដីដាំដុះឡើងវិញបាន ៦,៣៩២ហិកតា នៅសល់ ១,១៦៦ហិកតា និងខេត្តពោធិ៍សាត់ដាំដុះឡើងវិញបាន ១,១៧៦ហិកតា លើផ្ទៃដីដាំដុះឡើងវិញ ១៧,៨០៤ហិកតា។
ក្នុងឱកាសចុះពិនិត្យការបង្កបង្កើនផលឡើងវិញរបស់ប្រជាពលរដ្ឋ ឯកឧត្ដមទេសរដ្ឋមន្ត្រី គន់ គីម ក៏បានក្រើនរម្លឹកបន្ថែមដល់អាជ្ញាធរពាក់ព័ន្ធទាំងអស់ទាំងថ្នាក់ជាតិ ក្រោមជាតិ និងមូលដ្ឋានត្រូវយកចិត្តទុកដាក់ឱ្យបានហ្មត់ចត់លើការបង្កបង្កើនផលឡើងវិញរបស់ប្រជាពលរដ្ឋ។ ឯកឧត្ដមបានថ្លែងសង្កត់ធ្ងន់ថា ត្រូវតែចុះពិនិត្យមើលឱ្យដល់វាលស្រែ ហើយដាក់ចេញវិធានការដោះស្រាយលើបញ្ហាប្រឈមទាំងឡាយ៕
ប្រភព៖ ក្រសួងព័ត៌មាន