រដ្ឋាភិបាលថៃអនុញ្ញាតឲ្យ​ពលករចំណាកស្រុកមកពីប្រទេសមីយ៉ាន់ម៉ា ឡាវ និងកម្ពុជា ដែលត្រូវចប់អណត្តិការងារនៅឆ្នាំក្រោយនឹងត្រូវបានអនុញ្ញាតឱ្យបន្តធ្វើការនៅក្នុងប្រទេសថៃរហូតដល់ ២ ឆ្នាំទៀត។ យោងតាមអ្នកនាំពាក្យរដ្ឋាភិបាលរងលោកស្រី Rachada Dhnadirek បានឱ្យដឹងថា ការអនុញ្ញាតឱ្យពលករចំណាកស្រុកដែលបានចុះឈ្មោះស្របច្បាប់ស្នាក់នៅបានយូរត្រូវបានអនុម័តនៅក្នុងកិច្ចប្រជុំគណៈរដ្ឋមន្រ្តីប្រចាំសប្តាហ៍កាលពីម្សិលមិញ។ លោកស្រីបាននិយាយថា ការសម្រេចចិត្តនេះនឹងផ្តល់ផលប្រយោជន៍ដល់ពលករចំណាកស្រុកពីប្រទេសទាំងបីចំនួន ១៣០,០០០ នាក់នៅទូទាំងប្រទេស ប៉ុន្តែវាទាក់ទងនឹងអ្នកដែលត្រូវបានជ្រើសរើសក្រោមកិច្ចព្រមព្រៀងការងារដែលបានចុះហត្ថលេខាដោយប្រទេសនីមួយៗ។

ពលករចំណាកស្រុកដែលបញ្ចប់ការងារ ៤ ឆ្នាំនៅទីនេះក្នុងខែធ្នូឆ្នាំក្រោយ ជាធម្មតាត្រូវបានគេតម្រូវឱ្យវិលត្រឡប់ទៅប្រទេសកំណើតវិញ មុនពេលពួកគេត្រូវបានអនុញ្ញាតឱ្យដាក់ពាក្យសុំការអនុញ្ញាតការងារថ្មី។ ទោះយ៉ាងណាការកង្វះកម្លាំងពលកម្មបច្ចុប្បន្ននៅក្នុងប្រទេសថៃដែលបណ្តាលមកពីជំងឺរាតត្បាត Covid-19 បានបង្ខំឱ្យរដ្ឋាភិបាលអនុញ្ញាតឱ្យពលករចំណាកស្រុកនៅតែអាចបន្តលិខិតអនុញ្ញាតការងារបស់ពួកគេ នៅពេលដែលជិតផុតអណត្តិការងារ។ លោកស្រី Rachada បានបញ្ជាក់ថា នេះមានន័យថាពួកគេអាចនៅប្រទេសថៃដើម្បីធ្វើការរយៈពេល ២ ឆ្នាំទៀតចាប់ពីខែធ្នូឆ្នាំ ២០២១ ។

លោកស្រីបានបន្ថែមទៀតថា ជំងឺរាតត្បាតកំពុងរាតត្បាតខ្លាំងនៅក្នុងប្រទេសមីយ៉ាន់ម៉ា ដែលរារាំងពលករចំណាកស្រុកមួយចំនួនធំពីការវិលត្រឡប់ទៅប្រទេសថៃវិញ ដូច្នេះវិធានការចុងក្រោយនឹងជួយកាត់បន្ថយកង្វះខាតពលកម្មនេះ។ ជាមួយគ្នានេះពលករចំណាកស្រុកដែលមានបំណងដាក់ពាក្យសុំពន្យារពេលលិខិតឆ្លងដែននឹងត្រូវឆ្លងកាត់ការត្រួតពិនិត្យសុខភាព លិខិតបញ្ជាក់ការងាររបស់ពួកគេត្រូវបានផ្ទៀងផ្ទាត់ជាផ្លូវការ ស្វែងរកការពន្យារពេលការងារជាមួយការិយាល័យការងារដោយបង់ថ្លៃ ១,៩០០ បាត និងចុះបញ្ជីការងារឡើងវិញ៕

អត្ថបទ៖ លីនី
ប្រភព៖ bangkokpost