យោងតាមការិយាល័យស្ថិតិទូទៅរបស់វៀតណាមបានឱ្យដឹងថា ប្រទេសវៀតណាមបានទាក់ទាញការវិនិយោគផ្ទាល់ពីបរទេស (FDI) ចំនួន ២៣.៥ ពាន់លានដុល្លារក្នុងរយៈពេល ១០ ខែដំបូងនៃឆ្នាំនេះ ពោលគឺមានការថយចុះ ១៩.៤% បើធៀបនឹងឆ្នាំមុន។

ជាក់ស្តែងប្រទេសវៀតណាមបានផ្តល់អាជ្ញាប័ណ្ណ ដល់គម្រោងវិនិយោគផ្ទាល់ពីបរទេសថ្មីចំនួន ២,១០០ គម្រោងដែលមានដើមទុនចុះបញ្ជីសរុបចំនួន ១១.៧ ពាន់លានដុល្លារ ហើយបានមើលឃើញគម្រោងប្រតិបត្តិការ FDI ចំនួន ៩០៧ គម្រោងបានបង្កើនដើមទុនចំនួន ៥.៧ ពាន់លានដុល្លារអាមេរិក។

ទន្ទឹមនឹងនេះ ចន្លោះពីខែមករា ដល់ខែតុលា វិនិយោគិនបរទេសក៏បានចំណាយ ៦.១ ពាន់លានដុល្លារ ក្នុងការទិញភាគហ៊ុន និងចូលរួមវិភាគទានដើមទុនដល់ក្រុមហ៊ុនវៀតណាមដែលបានធ្លាក់ចុះ ៤៣.៥% បើធៀបនឹងឆ្នាំមុន។

គួរឱ្យដឹងផងដែរថា ក្នុងចំណោមប្រទេស និងតំបន់ចំនួន ៧៤ ដែលមានគម្រោងវិនិយោគដែលមានអាជ្ញាប័ណ្ណនៅក្នុងប្រទេសវៀតណាមប្រទេសសិង្ហបុរី គឺជាប្រភពធំបំផុតនៃដើមទុនចុះបញ្ជីថ្មីដែលមានទឹកប្រាក់ជិត ៥.៤ ពាន់លានដុល្លារ បន្ទាប់មកគឺចិនដែលមានទឹកប្រាក់ចំនួនជាង ១.៣ ពាន់លានដុល្លារ និងកូរ៉េខាងត្បូងដែលមានចំនួនជាង ១.១ ពាន់លានដុល្លារ៕

អត្ថបទ៖ នីតា
ប្រភព៖ xinhuanet