យោងតាមការលើកឡើងរបស់អ្នកឧកញ៉ា ពុង ឃាវសែ ដែលជាវិនិយោគិន និងពាណិជ្ជករដ៏ល្បីល្បាញបំផុតប្រចាំប្រទេសកម្ពុជា និងជាប្រធានក្រុមប្រឹក្សាភិបាលនៃក្រុមហ៊ុន វិនិយោគទុនអាណិកជនកម្ពុជា (OCIC) បានឲ្យដឹងថា ការចំណាយជិត ៥៥០ លានដុល្លារ នៃការសាងសង់ហេដ្ឋារចនាសម្ព័ន្ធសម្រាប់រយៈពេល ៣ឆ្នាំដំបូងនៃគម្រោងអភិវឌ្ឍន៍កោះនរា អាចរួមចំណែកដល់ផលិតផលក្នុងស្រុកសរុប (GDP) ប្រមាណជា ២២៥ លានដុល្លារអាមេរិក ក្នុងមួយឆ្នាំៗដែលស្មើនឹងជិត ០.៩% នាពេលបច្ចុប្បន្ន។
អ្នកឧកញ៉ាបានបញ្ជាក់ឲ្យដឹងដូច្នេះនៅក្នុងពិធី បើកការដ្ឋានសាងសង់ ស្ពានបេតុងខ្សែកាប ឆ្លងកាត់ទន្លេបាសាក់ តភ្ជាប់រាជធានីភ្នំពេញ ពីទីក្រុងកោះពេជ្រ ទៅកាន់ទីក្រុងរណបកោះនរា និងពីកោះនរា ឆ្ពោះទៅផ្លូវជាតិលេខ១ ក្នុងភូមិសាស្ត្រសង្កាត់និរោធ ខណ្ឌច្បារអំពៅ រាជធានីភ្នំពេញ នាព្រឹកថ្ងៃទី២៦ ខែតុលា ឆ្នាំ២០២០។
ក្នុងឱកាសនោះដែរ អ្នកឧកញ៉ា ពុង ឃាវសែ បានលម្អិតពីគម្រោងអភិវឌ្ឍកោះនរាថា៖ « គម្រោងអភិវឌ្ឍន៍កោះនរានឹងផ្ដល់អត្ថប្រយោជន៍សេដ្ឋកិច្ច សង្គមយ៉ាងច្រើនដល់ប្រទេសជាតិ ជាពិសេសនៅក្នុងកាលៈទេសៈនៃភាពលំបាកផ្នែកសេដ្ឋកិច្ច ដែលបច្ចុប្បន្នដែលកម្ពុជាកំពុងត្រូវការវិនិយោគបន្ថែម ជាច្រើន ដើម្បីទ្រទ្រង់សេដ្ឋកិច្ចឲ្យបានរឹងមាំ។ គម្រោងអភិវឌ្ឍកោះនរា គ្រោងចំណាយទុនសាងសង់ចំនួន ២៥០០ លានដុល្លារអាមេរិក ដោយឡែកសម្រាប់ថវិកាជិត ៥៥០ លានដុល្លារ នៃការសាងសង់ហេដ្ឋារចនាសម្ព័ន្ធសម្រាប់រយៈពេល ៣ឆ្នាំ ដំបូងត្រូវបានប៉ាន់ប្រមាណថា អាចរួមចំណែកដល់ផលិតផលក្នុងស្រុកសរុប (GDP) ប្រមាណជា ២២៥ លានដុល្លារអាមេរិក ក្នុងមួយឆ្នាំៗ ដែលស្មើនឹងជិត ០.៩% នាពេលបច្ចុប្បន្ន »។
លើសពីនេះអ្នកឧកញ៉ា បានបន្ថែមថា គម្រោងនេះក៏កំពុងប្រើប្រាស់កម្លាំងពលកម្ម ៧០០ នាក់ ហើយអាចឡើងទៅដល់ ៧០០០នាក់ នៅពេលការសាងសង់ចាប់ផ្ដើមពេញទំហឹង។ ហើយនៅពេលបញ្ចប់ការសាងសង់ គម្រោងនេះនឹងបង្កើតការងារប្រមាណជា ១ ម៉ឺនកន្លែង ដើម្បីដំណើរការប្រតិបត្តិការប្រចាំថ្ងៃ៕
អត្ថបទ៖ លីនី