យោងតាមការចេញផ្សាយរបស់ក្រសួងព័ត៌មានកាលពីថ្ងៃទី២៤ ខែសីហា កន្លងទៅនេះ បានឲ្យដឹងថា រាជរដ្ឋាភិបាលបានសម្រេចបង្កើនថវិកា « សាច់ប្រាក់សម្រាប់ការងារ » ពី ១០០ លានដុល្លារ ដល់ ១៦០ លានដុល្លារ ។ សម្តេចអគ្គមហាសេនាបតីតេជោហ៊ុន សែន បានប្រកាសបែបនេះនៅក្នុងពិធីចែក​អំណោយដល់ប្រជាពលរដ្ឋប្រមាណ ៥,០០០គ្រួសារ ដែលរងគ្រោះដោយទឹកជំនន់ភ្លាមៗនៅក្នុងស្រុកអូរជ្រៅ ខេត្តបន្ទាយមានជ័យ។

នាឱកាសនោះសម្ដេចតេជោបាន​សង្កត់ធ្ងន់ថា៖ « ក្នុងអំឡុងពេលប្រជុំ (កិច្ចប្រជុំគណៈរដ្ឋមន្រ្តីកាលពីពេលថ្មីៗនេះ) ខ្ញុំបានណែនាំឱ្យបែងចែកផលបូកទៅខេត្តដែលរងផលប៉ះពាល់ហើយយើងរំពឹងថាប្រាក់ ១៦០ លានដុល្លារអាចបង្កើតការងារ ១ លានការងារ »។

ជាមួយគ្នានោះសម្តេចនាយករដ្ឋមន្ត្រី ក៏បានលើកសេចក្តីព្រាងច្បាប់ស្តីពីថវិកាជាតិឆ្នាំ២០២១ ដែលត្រូវបានអនុម័តនៅថ្ងៃទី២៣ ខែតុលា ដោយទីស្តីការគណៈរដ្ឋមន្រ្តី។ ថវិកានេះ ជាថវិកាដើម្បីប្រយុទ្ធដើម្បីការពារអាយុជីវិតប្រជាជន ដើម្បីរក្សាស្ថេរភាពសេដ្ឋកិច្ច សង្គម និងជីវភាពរស់នៅរបស់ប្រជាជន ក៏ដូចជាឆ្ពោះទៅរកការស្តារសេដ្ឋកិច្ចឡើងវិញ បន្ទាប់ពីវិបត្តិកូវីដ-១៩។

យោងតាមរបាយការណ៍ចុងក្រោយរបស់គណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងថាចាប់ពីថ្ងៃទី១ ខែកញ្ញា ដល់ថ្ងៃទី២៣ ខែតុលា ទឹកជំនន់បានជះឥទ្ធិពលដល់ទីប្រជុំជន/សង្កាត់ ចំនួន ១១៧ ខេត្ត-ក្រុងចំំនួន ២០ នៃ ២៥ រាជធានី- ខេត្តរួមមាន រាជធានីភ្នំពេញ ពោធិ៍សាត់ ប៉ៃលិន ខេត្តបន្ទាយមានជ័យ បាត់ដំបង ស្វាយរៀង ត្បូងឃ្មុំ ឧត្តរមានជ័យ សៀមរាប តាកែវ កំពង់ស្ពឺ មណ្ឌលគីរី ព្រះសីហនុ កោះកុង ព្រះវិហារ ស្ទឹងត្រែង កំពង់ចាម កណ្តាល កំពង់ឆ្នាំង និងកំពង់ធំ។

ទឹកជំនន់ដែលកំពុងបន្តជន់លិចបណ្តាលឱ្យមនុស្សស្លាប់ ៣៩ នាក់ក្នុងនោះ ២២ នាក់នៅខេត្តបន្ទាយមានជ័យ លើសពីនេះទៀតប្រជាជនសរុបចំនួន ១៣៣,៧៩៤ គ្រួសារ ឬ ប្រជាជនចំនួន ៥៣៥,១៧៦ នាក់ត្រូវបានរងផលប៉ះពាល់ដែលក្នុងនោះ ១១,៦៤៧ គ្រួសារ ឬ ៤៦,៥៥៨ នាក់ត្រូវបានជម្លៀសទៅតំបន់សុវត្ថិភាព។ ក្រៅពីនេះផ្ទះចំនួន ១១៧,៨៨២ ខ្នង, សាលារៀន ៩២៤, ដីស្រែ ២៦៣,៩៣៣ ហិកតា, ដំណាំអនុផល ៨៨,៧៧៩ ហិកតា និងហេដ្ឋារចនាសម្ព័ន្ធជាច្រើនរួមមាន៖ ផ្លូវថ្នល់ ស្ពាននិងប្រឡាយ ត្រូវបានជន់លិច និងខូចខាត៕

អត្ថបទ៖ លីនី
ប្រភព៖ ក្រសួងព័ត៌មាន