សហរដ្ឋ​អាមេរិកផ្ដល់ហិរញ្ញប្បទានបន្ថែមដល់កម្ពុជាចំនួន ៦.២៥ លានដុល្លារ សម្រាប់វិស័យសំខាន់ៗមួយចំនួនដូចជា វិស័យសុខភាព អប់រំ បរិស្ថាន និងកសិកម្ម។ ហិរញ្ញប្បទានបន្ថែមនេះត្រូវបានចុះហត្ថលេខាកាលពីថ្ងៃទី០៨ ខែកញ្ញា ឆ្នាំ២០២០ ដោយរាជរដ្ឋាភិបាល​កម្ពុជា​ និងរដ្ឋាភិបាលសហរដ្ឋអាមេរិក លើកិច្ចវិសោធនកម្មហិរញ្ញប្បទានសហប្រតិបត្តិការអភិវឌ្ឍន៍រវាងប្រទេស​ទាំងពីរ​។

សូមជម្រាបថា ហិរញ្ញប្បទានថ្មីនេះ គឺបន្ថែមទៅលើហិរញ្ញប្បទានប្រមាណជា ៥៦ លានដុល្លារអាមេរិកដែលរដ្ឋាភិបាលសហរដ្ឋអាមេរិកបានផ្ដល់ តាមរយៈ USAID ដើម្បីអនុវត្តកម្មវិធីនានា ក្នុងវិស័យសុខភាព អប់រំ បរិស្ថាន និងកសិកម្ម។ ក្នុងនោះរួមមានទឹកប្រាក់ ១ លានដុល្លារអាមេរិក សម្រាប់កម្មវិធីសុខាភិបាល និងអប់រំ និង ចំនួន ៥​.២៥ លានដុល្លារអាមេរិក សម្រាប់កម្មវិធីកសិកម្ម​ និងបរិស្ថាន៕

អត្ថបទ៖ លីនី