អនុប្រធានធនាគារផ្ដល់ប្រាក់កម្ចីដែលមានមូលដ្ឋាននៅទីក្រុងវ៉ាស៊ីនតោន បានឲ្យដឹងថាគោលដៅរបស់ធនាគារពិភពលោក ដើម្បីកាត់បន្ថយអត្រាភាពក្រីក្របំផុតនៅលើពិភពលោកដល់ ៣% នៅឆ្នាំ២០៣០ កំពុងជួបប្រទះការលំបាកកាន់តែខ្លាំង ដោយសារតែការប៉ះពាល់យ៉ាងធ្ងន់ធ្ងរដល់សេដ្ឋកិច្ចដែលកំពុងអភិវឌ្ឍដោយជំងឺរាតត្បាត Covid-19។​

លោក Akihiko Nishio អនុប្រធានធនាគារពិភពលោកបានមានប្រសាសន៍ថា ការខិតខំប្រឹងប្រែងភាគច្រើនរបស់សហគមន៍អន្តរជាតិអាចត្រូវបានលុបចោល ដោយលោកអំពាវនាវដល់បណ្ដាប្រទេសជឿនលឿនរួមទាំងប្រទេសជប៉ុនផងដែរ ដើម្បីចូលរួមបង្កើនជំនួយហិរញ្ញវត្ថុ និងការគាំទ្រដទៃទៀតដល់ប្រទេសកំពុងអភិវឌ្ឍដើម្បីជួយពួកគេឲ្យរួចផុតពីការធ្លាក់ចុះសេដ្ឋកិច្ច។

គួរឲ្យដឹងផងដែរថា ក្នុងរយៈពេលប៉ុន្មានទសវត្សចុងក្រោយនេះ វឌ្ឍនភាពត្រូវបានធ្វើឡើងដើម្បីដោះស្រាយបញ្ហានេះ សម្រាប់ប្រជាជនលើពិភពលោកដែលរស់នៅក្រោមបន្ទាត់ភាពក្រីក្រខ្លាំងអន្តរជាតិ ដែលបច្ចុប្បន្នមានចំនួន ១.៩០ ដុល្លារក្នុងមួយថ្ងៃ ដែលធ្លាក់ចុះពី ៣៦% ពីឆ្នាំ១៩៩០ និង ១០% ពីឆ្នាំ២០១៥។

ទោះបីជាយ៉ាងណាក្ដី ធនាគារពិភពលោកមានការព្រួយបារម្ភថា ការរីករាលដាលនៃមេរោគឆ្លងនឹងមានផលប៉ះពាល់មិនស្មើគ្នាដល់ប្រជាជនក្រីក្រ តាមរយៈការបាត់បង់ការងារ ការបាត់បង់ប្រាក់បញ្ញើ និងការរំខានផ្នែកសេវាកម្មដូចជា ការអប់រំ និងការថែទាំសុខភាព។ ដោយធនាគារពិភពលោកបានប៉ាន់ប្រមាណថា អត្រាភាពក្រីក្រខ្លាំងនៅលើពិភពលោកអាចនឹងកើនឡើងពីខាងលើ ៨% ក្នុងឆ្នាំ២០១៩ ដល់ប្រហែល ៩% នៅឆ្នាំនេះ អាស្រ័យលើទំហំនៃវិបត្តិសេដ្ឋកិច្ចពីការរាតត្បាត៕

អត្ថបទ៖ លីនី
ប្រភព៖ kyodonews