កាលពីថ្ងៃទី១២ ខែសីហា ក្រុមប្រឹក្សាអ្នកដឹកជញ្ជូនជាតិប្រទេសថៃ (TNSC) បានស្នើសុំឱ្យធនាគារថៃស្វែងរកមធ្យោបាយ ដើម្បីបន្ថយសម្ពាធលើការនាំចេញ ខណៈប្រាក់បាតនៅតែបន្តកើនឡើង។

ប្រព័ន្ធផ្សព្វផ្សាយក្នុងស្រុកបានដកស្រង់សម្តីអនុប្រធាន TNSC លោក Visit Limluecha ថាលោកបានពិភាក្សាអំពីបញ្ហានេះជាមួយអភិបាលធនាគារ Bank of Thailand (BoT) អំពីកំណើនប្រាក់បាតកំពុងធ្វើឲ្យប៉ះពាល់ដល់ការប្រកួតប្រជែងនៃការនាំចេញរបស់ថៃ។ លោកបាននិយាយថា ក្រុមប្រឹក្សាមិនបានបញ្ជាក់ពីកម្រិតសមស្របសម្រាប់តម្លៃប្រាក់បាត និងមិនបានស្នើសុំឱ្យធនាគារកណ្តាលជ្រៀតជ្រែកនឹងតម្លៃរបស់ខ្លួន។ លោកគ្រាន់តែស្នើសុំឱ្យ BoT បន្ធូរបន្ថយលក្ខខណ្ឌសម្រាប់កម្មវិធីប្រាក់កម្ចីទន់ ដើម្បីពង្រីកលទ្ធភាពទទួលបានឥណទានសម្រាប់ប្រតិបត្តិករអាជីវកម្មខ្នាតតូច។

កាលពីដើមខែសីហា TNSC បាននិយាយថា ការនាំចេញរបស់ថៃអាចនឹងធ្លាក់ចុះ ១៥% ប្រសិនបើប្រទេសនេះមានអត្រាត្រឹមតែ ១៦.៤ ពាន់លានដុល្លារក្នុងមួយខែនៅឆមាសទី២ នៃឆ្នាំ ២០២០ ។ ក្នុងខែកក្កដា ក្រុមហ៊ុននាំចេញរបស់ថៃបានបន្ទាបចក្ខុវិស័យនៃការនាំចេញរបស់ប្រទេសនេះឱ្យធ្លាក់ចុះ ១០% គឺទាបជាងការព្យាករណ៍កាលពីមុននៃការធ្លាក់ចុះ ៨% ដោយសារវិបត្តិនៃជំងឺ​ Covid-19 និងប្រាក់បាតឡើងថ្លៃ។

លើសពីនេះទៅទៀត ការធ្លាក់ចុះនៃការបញ្ជាទិញ និងសេដ្ឋកិច្ចទន់ខ្សោយនៃដៃគូពាណិជ្ជកម្ម គឺជាសមាសធាតុសំខាន់នៅក្នុងការកាត់បន្ថយការព្យាករណ៍នាំចេញរបស់ TNSC ។ ដោយមើលឃើញពីកត្តាអវិជ្ជមានលោក Limluecha បានព្រមានថា ការដឹកជញ្ជូនអាចធ្លាក់ចុះ ១៥% ប្រសិនបើតួលេខប្រចាំខែនៅសល់មិនមានភាពប្រសើរ ហើយសរុបមិនក្រោម ១៧ ពាន់លានដុល្លារក្នុងមួយខែ។ យោងតាមក្រសួងពាណិជ្ជកម្មថៃការនាំចេញបានធ្លាក់ចុះ ២៣.២% នៅក្នុងខែមិថុនា ដែលជាកំណើនទាបបំផុតចាប់តាំងពីខែកក្កដា ឆ្នាំ ២០០៩ ។

គួរបញ្ជាក់ផងដែរថា ក្នុងឆមាសទី១ នៃឆ្នាំនេះការនាំចេញរបស់ថៃបានធ្លាក់ចុះ ៧.១% ធៀបនឹងរយៈពេលដូចគ្នាកាលពីឆ្នាំមុន មកនៅត្រឹម ១១៤ ពាន់លានដុល្លារខណៈការនាំចូលធ្លាក់ចុះ ១២.៦% ស្មើនឹង ១០៤ ពាន់លានដុល្លារ៕

អត្ថបទ៖ នីតា
ប្រភព៖ vietnamplus