ទោះបីជាមានការរីករាលដាលនៃជំងឺ Covid-19 និងតម្រូវការពិភពលោកមានការធ្លាក់ចុះយ៉ាងណាក៏ដោយ ក៏ប្រទេសចិននៅតែទាមទារការនាំចូលទុរេនរបស់ថៃឱ្យកាន់តែច្រើនថែមទៀត ដែលលើសពីការរំពឹងទុក។

យោងតាមទិន្ន័យរបស់ក្រសួងពាណិជ្ជកម្មថៃបានឱ្យដឹងថា ការនាំចេញទុរេន ដែលមានតំលៃ ៥៦៧.២៩ លានដុល្លារទៅកាន់ប្រទេសចិនក្នុងរយៈពេល ៤ ខែដំបូងនៃឆ្នាំ ២០២០ កើនឡើង ៧៨% បើធៀបនឹងរយៈពេលដូចគ្នាកាលពីឆ្នាំ ២០១៩ ។ ចិនមានចំនួន ៧២.១% នៃតម្លៃនាំចេញទុរេនទៅកាន់ពិភពលោក ក្នុងកំឡុងពេលដែលមានចំនួនសរុប ៧៨៧.៧២ លានដុល្លារកើនឡើង ៣០% បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។

លោក Auramon Supthaweethum អគ្គនាយកនៃនាយកដ្ឋានចរចាពាណិជ្ជកម្មបានមានប្រសាសន៍ថា កំណើនដ៏រឹងមាំនេះត្រូវបានជម្រុញមួយផ្នែកដោយកិច្ចព្រមព្រៀងពាណិជ្ជកម្ម និងការបញ្ជាទិញជាមុនដែលដាក់ដោយឈ្មួញចិន មុនពេលរដូវប្រមូលផលប្រចាំឆ្នាំ។ ទន្ទឹមនឹងនេះ លោក Jomkitti Sirikul អនុប្រធានជាន់ខ្ពស់នៃក្រុមហ៊ុន CP Group បានមានប្រសាសន៍ថា « តម្រូវការសម្រាប់ផ្លែទុរេននៅប្រទេសចិនគឺខ្ពស់ណាស់ ខណៈដែលការផ្គត់ផ្គង់ទុរេនរបស់ថៃគឺនៅមិនទាន់គ្រប់គ្រាន់ទៅតាមតម្រូវការ នៅក្នុងប្រទេសចិននៅឡើយទេ »។ លោក Jomkitti ប៉ាន់ប្រមាណថាផលិតផលទុរេនសរុបនៅថៃមានចំនួន ៩០០,០០០ តោនក្នុងមួយឆ្នាំដោយ ៨៥%​ ត្រូវបាននាំចេញ។

លើសពីនេះទៀត ក្រុមហ៊ុន CP Group នៅឆ្នាំនេះគ្រោងនឹងទិញកុងតឺន័រចំនួន ១០០ កុងតឺន័រ ឬទិញទុរេនសរុបចំនួន ១,៨០០ តោនពីកសិករ ដែលត្រូវបានគាំទ្រដោយមូលនិធិដែលរំពឹងថា នឹងអាចរកប្រាក់ចំណូលបានជាង ៥ លានដុល្លារពោលគឺកើនឡើងពី ៨០ លានបាតកាលពីឆ្នាំមុន៕

អត្ថបទ៖ នីតា
ប្រភព៖ bangkokpost