ភោជនីយដ្ឋានព្យុងយ៉ាង (កូរ៉េខាងជើង) និងសារមន្ទីរសព្វទស្សន៍អង្គរ រួមទាំងអាជីវកម្មផ្សេងទៀតដែលវិនិយោគដោយក្រុមហ៊ុនមកពីប្រទេសកូរ៉េខាងជើងនៅក្នុងខេត្តសៀមរាបត្រូវបានបញ្ឈប់អាជីវកម្ម ដោយសារការអនុវត្តតាមខ្លឹមសារសេចក្ដីសម្រេចលេខ២៣៩៧ របស់ក្រុមប្រឹក្សាសន្តិសុខអង្គការសហប្រជាជាតិ ពាក់ព័ន្ធនឹងដាក់ទណ្ឌកម្មលើប្រទេសកូរ៉េខាងជើង។ នេះបើយោងការអះអាងរបស់គេហទំព័រយុវជនប្រតិកម្មរហ័សរដ្ឋបាលក្រុងសៀមរាប បន្ទាប់ពីមានព័ត៌មានមួយចំនួនបានចុះផ្សាយថាការបិទនេះបណ្ដាលមកពីចំនួនភ្ញៀវទេសចរធ្លាក់ចុះ ធ្វើឲ្យអាជីវកម្មដួលរលំ។
គួរបញ្ចាក់ផងដែរថាសារមន្ទីរ 3D ដំបូងបង្អស់នៅកម្ពុជាសារមន្ទីរ 3D ឬ សារមន្ទីរសព្វទស្សន៍អង្គរ ដែលវិនិយោគដោយក្រុមហ៊ុនមកពីប្រទេសកូរ៉េខាងជើងនៅក្នុងខេត្តសៀមរាបបានសម្ពោធជាផ្លូវការកាលពីឆ្នាំ ២០១៥ ក្រោមការសាងសង់របស់ក្រុមហ៊ុនកូរ៉េខាងជើង និងមានការចូលរួមពីអាជ្ញាធរអប្សរាក្រោមទុនវិនិយោគ ២៤លានដុល្លារអាមេរិក។ ដោយកន្លងមកសារមន្ទីរ 3D ដំបូងបង្អស់នៅប្រទេសកម្ពុជានេះ បានចូលរួមចំណែកទាក់ទាញភ្ញៀវទេសចរទាំងជាតិ និងអន្តរជាតិ ដែលចង់ស្វែងយល់ពីវប្បធម៌ និងអច្ឆរិយរបស់ខ្មែរ ជាមួយការគ្រឿងបរិក្ខាទំនើបៗដែលអាចបង្ហាញអំពីប្រវត្តិនៃប្រាសាទបុរាណ និងប្រវត្តិនៃព្រះមហាក្សត្រខ្មែរតាមជំនាន់នីមួយៗតាមរយៈរូបភាព និងវីដេអូជាប្រភេទ 3D ផងដែរ៕
អត្ថបទ៖ លីនី