(ភ្នំពេញ)៖ រោងភាពយន្ត លេជេនបានបើកដំណើរការសាកល្បង នូវរោងភាពយន្តរបស់ខ្លួន ដែលជាសាខាទី៧ ស្ថិតនៅជាន់ទី៥ នៃផ្សារទំនើប ជីបម៉ុងណូរ៉ូម៉លនិងបានដាក់ឈ្មោះថា «Legend Premium Noro Mall» នៅថ្ងៃទី១៩ ខែធ្នូ ឆ្នាំ២០១៩នេះ អមដោយថ្នាក់ដឹកនាំ និងដៃគូរសហការជាច្រើននាក់ចូលរួម។

តំណាងរោងភាពយន្ត បានថ្លែងប្រាប់ឲ្យដឹងថា រោងភាពយន្ត លេជេនព្រីមៀម គឺស្ថិតនៅលើផ្លូវព្រះនរោត្តម ជាន់ទី៥នៃផ្សារទំនើប ជីបម៉ុងណូរ៉ូម៉លជាទីតាំងពិសេស នៅចំកណ្ដាលរាជធានីភ្នំពេញ។ ក្នុងនោះមាន ៤ Hall ប្រភេទ Kid Hall ចំនួន១, Diamond Hall ចំនួន២ (ប្រភេទ VIP), Premium Hall ចំនួន១ ហើយអ្នកដែលចូលទស្សនាភាពយន្ត នឹងទទួលបាននូវអារម្មណ៍ និងបទពិសោធថ្មី។

ជាការពិត ការរីកចម្រើនរបស់រោងភាពយន្តលេជេននេះ គឺជាឱកាសមិនអាចប្រកែកបានក្នុងការជម្រុញ ឲ្យវិស័យភាពយន្តក្នុងស្រុកកាន់តែមានភាពប្រសើរឡើង ដោយរាល់ការបន្ថែមទីតាំង នឹងសាលរបស់រោងភាពយន្តម្តងៗ នឹងធ្វើឲ្យភាពយន្តក្នុងស្រុកមានទីផ្សារ កាន់តែច្រើនជាងមុនក្នុងការដាក់បង្ហាញវណ្ណកម្មរបស់ខ្លួន ដែលអាចធ្វើឲ្យផលិតករក្នុងស្រុកទទួលប្រាក់ចំណូលបន្ថែម ដើម្បីអភិវឌ្ឍគុណភាពភាពយន្តរបស់ខ្លួនឲ្យសមស្រប ទៅតាមការរីកចម្រើនរបស់រោងកុន។

តំណាងរោងភាពយន្តដដែលបានបន្តថា ក្នុងថ្ងៃបើកដំណើរការសាកល្បង មានការចូលរួមយ៉ាងច្រើន ពីសំណាក់អ្នកគាំទ្រ ដោយក្នុងនោះមានការបញ្ចាំងពិសេស(Special Screening)និងមានកម្មវិធី Promotion ពិសេសៗ ជាច្រើនចាប់ពីថ្ងៃទី១៩ ដល់បំណាច់ឆ្នាំ២០១៩។

សូមបញ្ជាក់ថា រោងភាពយន្ត លេជេនរហូតមកដល់ពេលនេះ សរុបមានចំនួន៧ សាខាហើយ មានដូចជា រោងភាពយន្តលេជេនស៊ីធីម៉ល, រោងភាពយន្តលេជេនទួលគោក, រោងភាពយន្តលេជេនស្ទឹងមានជ័យ, រោងភាពយន្តលេជេនព្រីមមៀម(ផ្សារទំនើបអ៊ិចឈេងស្វែរ), រោងភាពយន្តលេជេនអេដិនហ្គាដេន, រោងភាពយន្តលេជេនហេរីថេកវ៉ក ខេត្តសៀមរាប និងរោងភាពយន្ត លេជេនព្រីមៀមផ្សារទំនើប ជីបម៉ុងណូរ៉ូម៉ល៕