ក្រុមហ៊ុនផលិតគ្រឿងអេឡិចត្រូនិកដ៏ធំបំផុតរបស់ពិភពលោក គឺក្រុមហ៊ុន Foxconn កំពុងសិក្សាលើលទ្ធភាពបង្កើតរោងចក្រ (ផលិតកម្ម) ផលិតអេក្រង់ទូរទស្សន៍ ដែលមានតម្លៃ ៤០លានដុល្លារ នៅភាគខាងជើងនៃប្រទេសវៀតណាម។ លោក Harry Zhuo នាយកប្រតិបត្តិនៃក្រុមហ៊ុនតៃវ៉ាន់ Hon Hai Precision Industry Co បាននិយាយថា សំណើនេះគឺដើម្បីបង្កើតរោងចក្រនៅឧទ្យានឧស្សាហកម្ម Dong Mai នៅជិតទីក្រុង Ha Long របស់ខេត្ត Quang Ninh ។

លោកបានប្រាប់អាជ្ញាធរខេត្ត Quang Ninh កាលពីពេលថ្មីៗថា រោងចក្រនេះនឹងផ្តល់ការងារដល់កម្មករចំនួន ៣,០០០នាក់។ អនុប្រធានខេត្តលោក Nguyen Van Thang ក៏បានសន្យាថា នឹងជួយជ្រោមជ្រែងដល់ក្រុមហ៊ុន Foxconn ដើម្បីទទួលបានអាជ្ញាប័ណ្ណឱ្យបានឆាប់ តាមដែលអាចធ្វើបាន។ ក្នុងខែមករារោងចក្រ Foxconn បានចំណាយប្រាក់ចំនួន ១៦.៥ លានដុល្លារ សម្រាប់ដីទំហំ ២៥០,០០០ ម៉ែត្រការ៉េ នៅក្នុងឧទ្យានឧស្សាហកម្មមួយនៅភាគខាងជើងខេត្ត Bac Giang ។

កាលនោះក្រុមហ៊ុន Foxconn មិនបានបញ្ជាក់ថា វាជាផលិតកម្មដែលទាក់ទងនឹងក្រុមហ៊ុន Apple នោះទេ ហើយនៅក្នុងឯកសារដាច់ដោយឡែកពីគ្នាមួយទៀតបាននិយាយថា ខ្លួនកំពុងលក់ដីនេះទៅឱ្យក្រុមហ៊ុន FIT Hon Teng ដែលបានចុះបញ្ជីនៅហុងកុង ដែលជាអ្នកផ្គត់ផ្គង់ខ្សែទូរស័ព្ទ និងឧបករណ៍ភ្ជាប់ឱ្យ iPhone ។ ក្រុមហ៊ុន Foxconn ដែលជាអ្នកផ្គត់ផ្គង់គ្រឿងអេឡិចត្រូនិចធំៗរបស់ក្រុមហ៊ុន Apple រួមទាំងទូរស័ព្ទ iPhone ផងនោះ បានមកកាន់ប្រទេសវៀតណាមជាលើកដំបូងនៅ ឆ្នាំ២០០៧ ។ រោងចក្រចំនួន ៣ របស់ Foxconn នៅក្នុងប្រទេសវៀតណាម ផលិត និងដំឡើងកុំព្យូទ័រ គ្រឿងបន្លាស់រថយន្ តនិងគ្រឿងអេឡិចត្រូនិកផ្សេងៗទៀត៕

អត្ថបទ៖ លីដា