យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា ក្រសួងពាណិជ្ជកម្មកម្ពុជា និងដៃគូជប៉ុន បានពង្រឹងកិច្ចសហប្រតិបត្តិ​ការ​លើវិស័យពាណិជ្ជកម្មឌីជីថល ដើម្បីជំរុញការនាំ​ផលិតផល​កម្ពុជា​ចូល​ទីផ្សារជប៉ុន តាមរយៈថ្នាលពាណិជ្ជកម្មជាតិ CambodiaTrade.com។

យោងតាមប្រភពក្រសួងពាណិជ្ជកម្មបានបញ្ជាក់ថា ក្នុងកម្មវិធីផ្គូផ្គង​ធុរកិច្ច​កម្ពុជា-ជប៉ុន ស្តីពីការជំរុញពាណិជ្ជកម្មឌីជីថល ដែលរៀបចំ​នៅមជ្ឈមណ្ឌលអាស៊ាន-ជប៉ុន (AJC) ទីក្រុងតូក្យូ កាលពីចុងសប្តាហ៍​កន្លងទៅ លោកជំទាវ ជា រដ្ឋា រដ្ឋលេខាធិការ​ក្រសួងពាណិជ្ជកម្ម បានបង្ហាញពីសក្តានុពលរបស់ CambodiaTrade.com ដែលជា​ថ្នាល​ជួយផ្សព្វផ្សាយ និងលក់ផលិតផល Made in Cambodia និង Made by Her ទៅកាន់ទីផ្សារអន្តរជាតិ។

កម្មវិធីនេះក៏បានផ្តល់ឱកាសឱ្យសហគ្រាសកម្ពុជា និងអ្នកទិញជប៉ុន​ជួប​ពិភាក្សាដោយផ្ទាល់ ដើម្បីស្វែងរកដៃគូអាជីវកម្ម ពង្រីក​បណ្តាញ​ពាណិជ្ជកម្មនិងជំរុញការនាំចេញផលិតផលកម្ពុជាទៅកាន់ទីផ្សារជប៉ុន។

លោកជំទាវ ជា រដ្ឋា បានឱ្យដឹងថា បន្ទាប់ពីបញ្ចប់កម្មវិធី សហគ្រាស​កម្ពុជាមួយចំនួនបានទទួលការទំនាក់ទំនងបន្តពីអ្នកទិញ​ជប៉ុន។ ក្នុងនោះ ក្រុមហ៊ុន ANON Cambodia បានចាប់ផ្តើមពិភាក្សាកិច្ច​សហ​ប្រតិបត្តិការលើផលិតផលប្រេងក្រអូប ខណៈអ្នក​ទិញជប៉ុន​ក៏បានបង្ហាញចំណាប់អារម្មណ៍លើកាហ្វេមណ្ឌលគិរី ទឹកឃ្មុំព្រៃ​មណ្ឌលគិរី និងសូត្រខ្មែរ ដែលបង្ហាញពីសក្តានុពល​របស់ផលិតផល​កម្ពុជាក្នុងទីផ្សារជប៉ុន។

ក្នុងឱកាសនោះដែរ គណៈប្រតិភូក្រសួងពាណិជ្ជកម្ម និងតំណាង​វិស័យ​ឯកជនកម្ពុជា បានទស្សនកិច្ចសិក្សានៅផ្សារទំនើប និង​បណ្តាញចែកចាយផលិតផលនៅជប៉ុន ដើម្បីសិក្សាពីការរៀបចំ​តាំងបង្ហាញផលិតផល ការវេចខ្ចប់ យុទ្ធសាស្ត្រទីផ្សារ និងនិន្នាការ​អ្នកប្រើប្រាស់ សម្រាប់លើកកម្ពស់គុណភាព និងសមត្ថភាពប្រកួត​ប្រជែងរបស់ផលិតផលកម្ពុជា។

ក្រសួងពាណិជ្ជកម្មបានបញ្ជាក់ថា បេសកកម្មនេះឆ្លុះបញ្ចាំងពីការ​ប្តេជ្ញា​ចិត្តក្នុងការប្រើប្រាស់បច្ចេកវិទ្យាឌីជីថល និងថ្នាល CambodiaTrade.com ដើម្បីពង្រីកទីផ្សារនាំចេញ និងភ្ជាប់​សហគ្រាស​​កម្ពុជាជាមួយអ្នកទិញអន្តរជាតិ ស្របតាមគោល​នយោបាយអភិវឌ្ឍន៍ពាណិជ្ជកម្មឌីជីថលរបស់កម្ពុជាឆ្ពោះទៅឆ្នាំ២០៣០។

យោងតាមអគ្គនាយកដ្ឋានគយ និងរដ្ឋាករកម្ពុជា ក្នុងរយៈពេល ៥ខែ ដើមឆ្នាំ២០២៦ ទំហំពាណិជ្ជកម្មកម្ពុជា-ជប៉ុន សម្រេច​បានជាង ១,២ពាន់លានដុល្លារ កើនឡើង ១៧,២ភាគរយ។ ក្នុងនោះ ការនាំ​ចេញរបស់កម្ពុជាទៅជប៉ុនមានតម្លៃ ៧៦៦លាន​ដុល្លារ កើនឡើង ២០,៦ភាគរយ ខណៈការនាំចូលពីជប៉ុនមានតម្លៃ ៤៣៤លានដុល្លារ កើនឡើង ១១,៨ភាគរយ បើធៀបនឹង​រយៈពេលដូចគ្នាកាលពីឆ្នាំ​២០២៥៕ ដោយ៖ក្រុមការងារMoINFO APP រូបថត៖ក្រសួងពាណិជ្ជកម្ម