កាលពីថ្ងៃទី២២ ខែឧសភា ឆ្នាំ២០២៥ កម្ពុជាបានប្រារព្ធពិធីអបអរសាទរ ការ ទទួលបានក្រុមហ៊ុនវិនិយោគចំនួន២០០ និងសំណេះសំណាលជាមួយកម្មករ-និយោជិត នៅតំបន់សេដ្ឋកិច្ចពិសេសក្រុងព្រះសីហនុក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តំបន់សេដ្ឋកិច្ច។ជាមួយនឹងសមិទ្ធផលទើបទទួលបាន តំបន់សេដ្ឋកិច្ច ពិសេស ដ៏មានសក្តានុពល ក៏រំពឹងថា នឹងទទួលបានក្រុមហ៊ុនពី៣០០ ទៅ៤០០ក្រុមហ៊ុន នឹងបោះជំហានចូលមកកាន់ទីនេះនៅពេលខាងមុខ។
ក្តីរំពឹងខាងលើបានពន្លេចឱ្យឃើញក្នុងជំនួបរវាងឯកឧត្តម ស៊ូ គុនលីង អភិបាល ខេត្តជាំងស៊ូ ក្នុងដំណើរទស្សនកិច្ចខេត្តព្រះសីហនុ ជាមួយឯកឧត្តម ម៉ាង ស៊ីណេត អភិបាលខេត្តព្រះសីហនុកាលពីថ្ងៃទី២១ ខែឧសភា គឺនៅមុនមួយថ្ងៃនៃពិធីអបអរតំបន់សេដ្ឋកិច្ចពិសេសក្រុងព្រះសីហនុ ទទួលបាន២០០ក្រុមហ៊ុន ជាមួយនឹងការផ្តល់ការងារចំនួនបីម៉ឺននាក់។
ប្រភពព័ត៌មានបានបញ្ជាក់ថា នៅក្នុងជំនួបជាមួយឯកឧត្តម ស៊ូ គុនលីង អភិបាល ខេត្តជាំងស៊ូ , ឯកឧត្តម ម៉ាង ស៊ីណេត អភិបាលខេត្តព្រះសីហនុបានជម្រាបជូន ភ្ញៀវថា រាជរដ្ឋាភិបាលបានបោះទុនវិនិយោគលើហេដ្ឋារចនាសម្ព័ន្ធជាង ៣០០លានដុល្លារអាមេរិក កសាងហេដ្ឋារចនាសម្ព័ន្ធផ្លូវក្នុងក្រុងព្រះសីហនុ មុនកូវីដ-១៩ រួមទាំងការអនុវត្តគោលនយោបាយ ខ្សែក្រវាត់ និងផ្លូវ ដោយផ្សា ភ្ជាប់នឹងយុទ្ធសាស្រ្តចតុកោណ និងយុទ្ធសាស្រ្តបញ្ចកោណដំណាក់កាលទី១នៃ រាជរដ្ឋាភិបាលទី៧នៃរដ្ឋសភា។
ចំណែកឯកឧត្តម ស៊ូ គុនលីន អភិបាលខេត្តជាំងស៊ូ នៃសាធារណរដ្ឋប្រជាមានិតចិន បានរំលឹកថា កាលពីឆ្នាំ២០២២ រដ្ឋបាលខេត្តជាំងស៊ូ បានទទួលស្វាគមន៍អភិបាលខេត្តព្រះសីហនុ ក្នុងដំណើរទស្សនកិច្ចនៅខេត្តជាំងស៊ូ ដែលកាលនោះតំបន់សេដ្ឋកិច្ចពិសេសក្រុងព្រះសីហនុ មានក្រុមហ៊ុនវិនិយោគចំនួន១០០ ប៉ុណ្ណោះ ប៉ុន្តែមកដល់ថ្ងៃនេះ តំបន់សេដ្ឋកិច្ចពិសេសក្រុងព្រះសីហនុមានក្រុមហ៊ុន បានកើនឡើងដល់ចំនួន២០០ក្រុមហ៊ុន។
ខេត្តជាំងស៊ូ ជាប់សមុទ្រភាគខាងកើតនៃប្រទេសចិន ប្រជាជន ៨៥លាននាក់ មានសេដ្ឋកិច្ចមានការរីកចម្រើន ។ឯកឧត្តមអភិបាលខេត្តស៊ូជាំងបានបញ្ជាក់ថា ដំណើរទស្សនកិច្ចរបស់លោកនៅពេលនេះ ក្នុងគោលបំណងអនុវត្តនូវកិច្ចសហប្រតិបត្តិការលើគម្រោងវិនិយោគតំបន់សេដ្ឋកិច្ចពិសេសក្រុងព្រះសីហនុ ព្រោះគម្រោងតំបន់សេដ្ឋកិច្ចក្រុងព្រះសីហនុ ជាគម្រោងកិច្ចសហប្រតិបត្តិការរវាងចិន និងកម្ពុជា តាមរយៈគោលនយោបាយ ខ្សែក្រវាត់ និងផ្លូវ ហើយតំបន់សេដ្ឋកិច្ចពិសេសក្រុងព្រះសីហនុ ឯកឧត្តមសង្ឃឹមថានឹងទទួលបានក្រុមហ៊ុនពី៣០០ ទៅ៤០០ជាមិនខាន។
ឯកឧត្តម ស៊ូ គុនលីន អភិបាលខេត្តជាំងស៊ូ បានលើកឡើងថា ឆ្នាំ២០២៥ គឺជាឆ្នាំផ្លាស់ប្តូរទេសចរណ៍ចិន និងកម្ពុជា ។ខេត្តជាំងស៊ូ និងខេត្តព្រះសីហនុ មានភូមិសាស្ត្រដូចគ្នា ហើយបង្កើតបាននូវកិច្ចសហប្រតិបត្តិការជាមួយគ្នាលើវិស័យអប់រំ សុខាភិបាល ។ដោយឡែកដំណើរទស្សនកិច្ចនាពេលនេះ ក៏បានផ្តោតសំខាន់ទៅលើការងារមនុស្សធម៌ជួយដល់សាលាបឋមសិក្សា និងអនុវិទ្យាល័យបិតត្រាំង ជាំងស៊ូ ព្រមទាំងបាននាំមកនូវក្រុមគ្រូពេទ្យស្ម័គ្រចិត្តខេត្តជាំងស៊ូ ជួយពិនិត្យព្យាបាលជំងឺបេះដូង និងជំរុញបង្កើតមូលនិធិសប្បុរសធម៌ដើម្បីជួយគ្នាទៅវិញទៅមក ។
សូមជម្រាបថា ខេត្តព្រះសីហនុ ត្រូវបានប្រមុខរាជរដ្ឋាភិបាលសម្ដេចបវរធិបតី ហ៊ុន ម៉ាណែត នាយករដ្ឋមន្រ្តីប្រកាសជាខេត្តបញ្ចប់ការវាស់វែងដីធ្លី មានលក្ខណៈជាប្រព័ន្ធ នឹងបន្តចុះបញ្ជីក្បាលដី ដើម្បីត្រៀមចែកបណ្ណកម្មសិទ្ធិជូនពលរដ្ឋជាបន្តបន្ទាប់ ។ សម្ដេចបវរធិបតីបានគូសរំលេចថា ការបញ្ចប់ការវាស់វែងដីធ្លីនៅក្នុងខេត្តព្រះសីហនុ នឹងអាចទាក់ទាញការវិនិយោគនៅក្នុងខេត្តព្រះសីហនុបន្ថែមទៀត ពីព្រោះ វិនិយោគិនដែលចូលមកស្វែងរកការវិនិយោគនៅក្នុងខេត្តព្រះសីហនុនឹងលែងបារម្ភថា ដីដែលខ្លួនវិនិយោគនឹងមានបញ្ហា៕
