យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា ត្រីមាសទី១ ឆ្នាំ២០២៥ កន្លងទៅនេះពន្ធដារបានប្រមូលពន្ធអាករគ្រប់ប្រភេទចូលក្នុងកញ្ចប់ថវិកាជាតិបានចំនួន ៥ ០២៨,០១ប៊ីលានរៀល (ប្រមាណ ១ ២៥៣,៨៧លានដុល្លារអាមេរិក)។ ចំណូលនេះស្មើនឹង ៣០,៨៨ភាគរយ នៃផែនការកំណត់ក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥។
ព្រឹត្តិបត្រពន្ធដារ ត្រីមាសទី១ ដែលអគ្គនាយកដ្ឋានពន្ធដារទើបចេញផ្សាយនៅថ្ងៃទី៨ ខែឧសភា ឆ្នាំ២០២៥ បានបញ្ជាក់ថា ក្នុងចំណោមចំណូលដែលប្រមូលបាន ១ ២៥៣,៨៧លានដុល្លារ គឺមាន ៤ ០៩២,៤១ពាន់លានរៀល ស្មើនឹង ៨១,៣៩ ភាពរយ បានពីការប្រមូលពន្ធអាករអ្នកជាប់ពន្ធធំ។
ប្រភពដដែលបន្តថា សម្រាប់ចំណូលពីអ្នកជាប់ពន្ធមធ្យមវិញនោះ គឺពន្ធដារប្រមូលបាន ៧៣៧,៩១ ពាន់លានរៀល ស្មើនឹង ១៤,៦៨ ភាគរយ ចំណែកចំណូលពន្ធអាករពីអ្នកជាប់ពន្ធតូច ប្រមូលបាន ៣៣,៤៧ ពាន់លានរៀល ស្មើនឹង ០,៦៧ភាគរយ។
ក្នុងរយៈពេលនេះ ចំណូលអាករពីប្រភេទពន្ធផ្សេងៗ (ពន្ធលើថ្លៃឈ្នួលអចលនទ្រព្យ ពន្ធលើអចលនទ្រព្យ និងពន្ធផ្សេងៗ) អគ្គនាយកដ្ឋានប្រមូលបាន ១៦៤,២០ពាន់លានរៀល ស្មើនឹង ៣,២៧ភាគរយ នៃចំណូលអាករសរុប នៅក្នុងត្រីមាសទី១ ឆ្នាំ២០២៥។
ឯកឧត្តម គង់ វិបុល អគ្គនាយកនៃអគ្គនាយកដ្ឋានពន្ធដារ បានគូសរំលេចថា ចំពោះប្រភេទចំណូលពន្ធសំខាន់ៗ ដែលពន្ធដារប្រមូលបានសម្រាប់ទ្រទ្រង់ការចំណាយរបស់រដ្ឋាភិបាលនោះ មានពន្ធលើប្រាក់ចំណូលចំនួន ២ ៣៣២,៧០ពាន់លានរៀល អាករលើតម្លៃបន្ថែមចំនួន ៩០២,៤០ពាន់លានរៀល អាករពិសេសចំនួន ២០៤ពាន់លានរៀល ពន្ធប្រថាប់ត្រាសរុប (ផ្ទេរកម្មសិទ្ធិកាន់កាប់អចលនទ្រព្យ) ចំនួន១៤៤,២៥ពាន់លានរៀល។ ពន្ធកាត់ទុកទូទៅចំនួន ៨៥៤,៩៥ពាន់លានរៀល និងចំណូលពន្ធផ្សេងៗមានចំនួន ១៨៣,៣៦ពាន់លានរៀល៕
ប្រភព៖ ក្រសួងព័ត៌មាន