យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា រយៈពេល២ខែដើមឆ្នាំ២០២៥នេះ ទំហំពាណិជ្ជកម្មអន្តរជាតិរបស់កម្ពុជាសម្រេចបានប្រមាណ ៩.៤៤ ពាន់លានដុល្លារអាមេរិកពោលគឺកើនឡើង ១៦.៣ ភាគរយ បើធៀបនឹងរយៈពេលដូចគ្នានៃឆ្នាំ២០២៤។នេះបើយោងតាមរបាយការណ៍អគ្គនាយកដ្ឋានគយ និងរដ្ឋាករកម្ពុជានៃក្រសួងសេដ្ឋកិច្ច និងហិរញ្ញវត្ថុ។
ប្រភពដដែលបញ្ជាក់ថា ចាប់ពីខែមករាដល់ខែកុម្ភៈ កម្ពុជាបាននាំចេញទំនិញទៅបរទេសក្នុងតម្លៃ ៤ ៤៦០លានដុល្លារ គឺកើនឡើង ១១.៩ ភាគរយ ខណៈការនាំចូលមកវិញចំនួន ៤ ៩៨៧លានដុល្លាររ កើនឡើង ២០.៦ ភាគរយ។
របាយការណ៍បានគូសរំលេចថា អាមេរិក និងវៀតណាម គឺជាទីផ្សារធំសម្រាប់ការនាំចេញរបស់កម្ពុជា ។ ទីផ្សារសហរដ្ឋអាមេរិកមានទំហំនាំចេញចំនួន ១,៦២៦ លានដុល្លារ និងទីផ្សារវៀតណាមទំហំនាំចេញ ៦៤៨ លានដុល្លារ។ ចំណែកប្រទេសចិន ក៏ជាអ្នកនាំចូលដ៏ធំបំផុតរបស់កម្ពុជា ជាមួយនឹងទឹកប្រាក់ចំនួន ២,៤៤៤ លានដុល្លារ គឺ កើនឡើង២៤ភាគរយពីឆ្នាំមុន។
គប្បីជម្រាបជូនថា ផលិតផលនាំចេញសំខាន់របស់កម្ពុជា រួមមានសម្លៀកបំពាក់ គ្រឿងចក្រ ឧបករណ៍អគ្គិសនី ផលិតផលស្បែកជើង គ្រាប់ធញ្ញជាតិ គ្រឿងសង្ហារិម កៅស៊ូ ផ្លែឈើ បន្លែ គុជ ប្រដាប់ក្មេងលេង និងវាយនភណ្ឌ។
ធនាគារជាតិនៃកម្ពុជាបានព្យាករថា ឆ្នាំ២០២៥នេះកំណើនសេដ្ឋកិច្ចរបស់កម្ពុជាស្ថិតក្នុងអត្រា ៦.២ភាគរយ ដោយសារតែកំណើនដ៏រឹងមាំនៃការនាំចេញផលិតផលកាត់ដេរ និងផលិតផលមិនមែនកាត់ដេរ គួបផ្សំនឹងការរីកចម្រើនជាវិជ្ជមាននៃវិស័យទេសចរណ៍ និងកសិកម្ម៕
ប្រភព៖ ក្រសួងព័ត៌មាន