យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា ចាប់តាំងពីរាជរដ្ឋាភិបាលថ្មីនីតិកាលទី៧នៃរដ្ឋសភា ប្រសូតចេញកាលពីថ្ងៃទី២២ ខែសីហា ឆ្នាំ២០២៣ កម្ពុជាទទួលបានគម្រោងវិនិយោគសរុបចំនួន ២៣៧គម្រោង ជាមួយទុនវិនិយោគប្រមាណជាង៦.០០០លានដុល្លារអាមេរិក ក្នុងនោះវិនិយោគិនចិនបានរួមចំណែកច្រើនជាងគេ ។
បើតាម ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជាបញ្ជាក់កាលពីថ្ងៃទី១៤ ខែសីហាកន្លងទៅថ្មីៗនេះថា កត្តាសុខសន្តិភាព ស្ថិរភាព នយោបាយ និងកំណើនសេដ្ឋកិច្ចរបស់កម្ពុជា ធ្វើឱ្យវិនិយោគិនក្នុង និងក្រៅប្រទេសជឿជាក់លើការដឹកនាំរបស់រាជរដ្ឋាភិបាលកម្ពុជា និងបានបោះទុនវិនិយោគជាបន្តបន្ទាប់។ រយៈពេល១១ខែក្រោយការបង្កើតរាជរដ្ឋាភិបាលថ្មីដឹកនាំដោយសម្ដេចមហាបវរធិបតី ហ៊ុន ម៉ាណែត កម្ពុជាទទួលបានទុនវិនិយោគជាង៦.០០០លានដុល្លារ បើធៀបនឹង១១ខែមុននេះ មានការកើនឡើងរហូតដល់២២០ភាគរយ ។
ឯកឧត្តមបន្តថា រាជរដ្ឋាភិបាលក៏បានខិតខំទាក់ទាញវិនិយោគិនពីបរទេសឱ្យចូលមកបណ្ដាក់ទុនវិនិយោគនៅកម្ពុជាបន្ថែម ទន្ទឹមនឹងនោះដែរ រាជរដ្ឋាភិបាលក៏បានសាងសង់ហេដ្ឋារចនាសម្ព័ន្ធនានាដើម្បីទាក់ទាញវិនិយោគិនបរទេស ដូចជាសាងសង់ស្ពានឆ្លងទន្លេ ទាំងនៅភ្នំពេញនិងបណ្ដាខេត្ត សាងសង់ព្រែកជីកហ្វូណនតេជោ ដែលទើបបើកការដ្ឋានកាលពីពេលថ្មីៗនេះជាដើម ។
ឯកឧត្តមឧបនាយករដ្ឋមន្ត្រីបានបន្ថែមឱ្យដឹងថា នៅខែក្រោយនេះ ឯកឧត្តមនឹងដឹកនាំប្រតិភូកម្ពុជាដែលមានមន្ត្រីរាជរដ្ឋាភិបាល និងវិនិយោគិនកម្ពុជាទៅបំពេញទស្សនកិច្ចនៅប្រទេសចិន សហរដ្ឋអាមេរិក ប្រទេសក្នុងតំបន់មជ្ឈិមបូព៌ា និងបណ្ដាប្រទេសតំបន់អឺរ៉ុប ដើម្បីទាក់ទាញវិនិយោគិននៅបណ្ដាប្រទេសទាំងនោះចូលមកកម្ពុជាស្វែងរកដៃគូក្នុងស្រុកបណ្ដាក់ទុនវិនិយោគរួមគ្នា ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាកាលពីពេលថ្មីៗបានបង្ហាញថា ក្នុងរយៈពេល៧ខែនៃឆ្នាំ ២០២៤នេះកម្ពុជាទទួលបានទុនវិនិយោគប្រមាណ ៣,៦ពាន់លានដុល្លារអាមេរិក ពីគម្រោងចំនួន ២៣៤គម្រោងទាំងក្រុមហ៊ុនវិនិយោគថ្មី និងក្រុមហ៊ុនពង្រីកផលិតកម្មវិនិយោគនៅក្នុងប្រទេសកម្ពុជា ។
របាយការណ៍ដដែលបង្ហាញថា គម្រោងភាគច្រើនដែលត្រូវបានក្រុមប្រឹក្សាអភិវឌ្ឍន៍កម្ពុជាអនុម័តកន្លងមកនេះគឺគម្រោងក្នុងវិស័យឧស្សាហកម្មរោងចក្រ និងមានទីតាំងនៅតាមបណ្ដាខេត្តនៅជាប់រាជធានីភ្នំពេញ និងតាមព្រំដែនកម្ពុជា ៕
