យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា ឯកឧត្តម យុន ហេង អគ្គលេខាធិការរង គណៈកម្មាធិការវិនិយោគកម្ពុជា និងសហការី នារសៀលថ្ងៃទី១៩ ខែកក្កដា ឆ្នាំ២០២៤ នៅទីស្ដីការក្រុមប្រឹក្សាអភិវឌ្ឍន៍កម្ពុជា បានទទួលជួបសម្តែងការគួរសមនិងពិភាក្សាការងារ ជាមួយគណៈប្រតិភូដែលដឹកនាំដោយលោក Tuan Ba អនុប្រធាននៃក្រុមហ៊ុន TIRECYCLE POWER HOLDINGS រដ្ឋតិចសាស់ សហរដ្ឋអារិក។ នេះជាការបំពេញទស្សនកិច្ចរបស់ក្រុមហ៊ុន ជាលើកដំបូងនៅប្រទេសកម្ពុជា។

ឯកឧត្តមអគ្គលេខាធិការរង បានសម្តែងនូវការស្វាគមន៍ជូនចំពោះ គណៈប្រតិភូដែលបានចំណាយពេលវេលាដ៏មានតម្លៃក្នុងការបំពេញទស្សនកិច្ចដោយផ្ទាល់មកកាន់កម្ពុជា និងបានសម្តែងនូវការចាប់អារម្មណ៍ពីកាលានុវត្តភាពវិនិយោគនៅកម្ពុជា។

ទន្ទឹមនេះ ឯកឧត្តម ក៏បានឆ្លៀតគូសបញ្ជាក់ជូនគណៈប្រតិភូអំពីរបបនៃការលើកទឹកចិត្ត ប្រកបដោយភាពអំណោយផលនិងអនុគ្រោះបំផុតរបស់រដ្ឋាភិបាលកម្ពុជាដែលបានផ្ដល់ចំពោះសកម្មភាពវិនិយោគ និងវិស័យដែលមានសក្តានុពលសំខាន់ៗ ដូចបានកំណត់ក្នុងច្បាប់ស្តីពីវិនិយោគនៃព្រះរាជាណាចក្រកម្ពុជាផងដែរ។

គណៈប្រតិភូ បានជំរាបជូនឯកឧត្តមអគ្គលេខាធិការរងអំពីគោលបំណងដ៏សំខាន់នៃដំណើរទស្សនកិច្ចលើកដំបូងនេះ គឺដើម្បីស្វែងរកឱកាសវិនិយោគបន្ថែមទៀតនៅប្រទេសកម្ពុជាដែលនឹងរួម ចំណែកយ៉ាងសំខាន់ក្នុងការជំរុញកំណើនសេដ្ឋកិច្ច ការទាក់ទាញវិនិយោគក្នុងវិស័យថាមពលដែលមានសក្តានុពលសំខាន់។

លោកមានភាពកក់ក្ដៅជាទីបំផុត និងបញ្ជាក់យ៉ាងច្បាស់ថា នឹងមកបន្ដាក់ទុនវិនិយោគនៅកម្ពុជា ក៏ដូចជាការធ្វើឱ្យកាន់តែប្រសើរនាពេលអនាគត។

ឯកឧត្តមអគ្គលេខាធិការរងបានថ្លែងនូវអំណរអរគុណយ៉ាងជ្រាលជ្រៅជូនចំពោះគណៈប្រតិភូក្រុមហ៊ុន TIRECYCLE POWER HOLDINGS ចំពោះការជ្រើសរើសកម្ពុជាជាទិសដៅក្នុងការបំពេញទស្សនកិច្ចស្វែងរកឱកាសវិនិយោគ និងបានបង្ហាញនូវស្មារតីស្វាគមន៍ជានិច្ចសម្រាប់រាល់កិច្ចសហប្រតិបត្តិការនានា នាពេលខាងមុខ ព្រមទាំងបានជូនពរគណៈប្រតិភូឱ្យទទួលបានជោគជ័យក្នុងដំណើរទស្សនកិច្ចការងារនៅកម្ពុជា នាពេលនេះ៕

ប្រភព៖ ក្រសួងព័ត៌មាន