យោងតាមការចុះផ្សាយរបស់សារព័ត៌មាន Bangkok Post កាលពីថ្ងៃទី១៥ ខែកក្កដា ឆ្នាំ២០២៤ នេះ បានឱ្យដឹងថា សេដ្ឋកិច្ចថៃ កំពុងប្រឈម​នឹង​ភាព​ចលាចល​ ដោយសារ​ការ​បិទ​រោងចក្រជាច្រើន និង​ការ​ហូរចូលទំនិញចិនថោកៗទៅក្នុងទីផ្សារប្រទេសថៃ។

សារព័ត៌មានខាងលើបានឱ្យដឹងថា បើទោះបីជាការប្រកាសបិទរោងចក្រផលិតរថយន្តរបស់ក្រុមហ៊ុន Suzuki Motor នៅប្រទេសថៃដែលអាចផលិតរថយន្តបាន ៦០,០០០គ្រឿងក្នុងមួយឆ្នាំំ កាលពីប៉ុន្មានសប្ដាហ៍មុននេះ ទទួលបានការចាប់អារម្មណ៍តិចតួច តែការសម្រេចចិត្តបិទរោងចក្ររបស់ក្រុមហ៊ុនជប៉ុនមួយនេះ បានឆ្លុះបញ្ចាំងពីការសម្រេចចិត្តស្រដៀងគ្នារបស់ក្រុមហ៊ុនជាច្រើនផ្សេងទៀតនៅក្នុងប្រទេសថៃ ដែលកំពុងជួបបញ្ហាប្រឈមជាច្រើនដូចជា ការហូរចូលទំនិញថោកៗពីប្រទេសចិន ការកើនឡើងតម្លៃថាមពល និងកម្លាំងពលកម្មដែលមានវ័យចំណាស់ ហើយកត្តាទាំងអស់នេះធ្វើឱ្យប្រទេសថៃធ្លាក់ចុះក្នុងការប្រកួតប្រជែងផ្នែកឧស្សាហកម្ម។ ជាក់ស្ដែងរោងចក្រជិត ២,០០០ នៅក្នុងប្រទេសថៃ ដែលរួមចំណែកជិតមួយភាគបួននៃផលិតផលក្នុងស្រុកសរុប (GDP) របស់ប្រទេសនេះ បានបិទទ្វារកាលពីឆ្នាំ២០២៣។

ជាមួយគ្នានេះដែរ ទិន្នន័យចុងក្រោយរបស់នាយកដ្ឋានការងារឧស្សាហកម្ម ការបិទរោងចក្រនៅចន្លោះខែកក្កដា ឆ្នាំ២០២៣ ដល់ខែមិថុនា ឆ្នាំ២០២៤ បានកើនឡើង ៤០% ហើយជាលទ្ធផលការបាត់បង់ការងារបានកើនឡើង ៨០% ក្នុងអំឡុងពេលដូចគ្នា ដោយកម្មករជាង ៥១,៥០០ នាក់បានឈប់ដោយគ្មានការងារធ្វើ។

ទន្ទឹមនឹងនេះ ផ្នែកស្រាវជ្រាវរបស់ធនាគារ Kiatnakin Phatra បាននិយាយនៅក្នុងកំណត់ត្រាខែមិថុនាថា ចំនួននៃការបើករោងចក្រថ្មីក៏បានថយចុះផងដែរ ដោយរោងចក្រធំៗបិទ និងរោងចក្រតូចៗបើកជំនួសវិញ។ ដោយឡែកលោក Sangchai Theerakulwanich ប្រធានសហព័ន្ធសហគ្រាសធុនតូច និងមធ្យមថៃ បាននិយាយថា ទន្ទឹមនឹងនោះក្រុមហ៊ុនផលិតតូចៗកំពុងប្រឈមនឹងការកើនឡើងនៃថ្លៃដើមផលិតកម្ម ដោយសារការឡើងថ្លៃថាមពល និងប្រាក់ឈ្នួលខ្ពស់គួរសម។ លោក​បាន​បន្ត​ថា​៖ «​យើង​ប្រកួត​ប្រជែង​ជាមួយ​នឹង​អាជីវកម្ម​ចម្រុះ​ជាតិ​សាសន៍។ អ្នក​ផលិត​មិន​អាច​សម្រប​ខ្លួន​បាន​លឿន​ត្រូវ​បិទ​អាជីវកម្ម ឬ​ផ្លាស់​ប្តូរ​ដើម្បី​ធ្វើ​អ្វី​ផ្សេង»។

សារព័ត៌មាន ខាងលើ ក៏បានបញ្ជាក់ផងដែរថា សម្រាប់​ពេល​នេះ សេដ្ឋកិច្ច​របស់​ប្រទេស​ថៃ​ ត្រូវ​បាន​គេ​ព្យាករ​ថា ​នឹង​មាន​កំណើន​ត្រឹម​តែ ២,៥ ភាគរយ​ប៉ុណ្ណោះ​នៅ​ឆ្នាំ​នេះ ហើយនេះស្ថិតក្នុង​ចំណោម​កត្តា​ដែល​ធ្វើ​ឲ្យ​ប្រជាជន​ថៃ​ភាគច្រើន​មិន​ពេញ​ចិត្ត​នឹង​ការ​អនុវត្ត​របស់​​នាយក​រដ្ឋមន្ត្រីថ្មី៕

អត្ថបទ៖ លីនី
ប្រភព៖ Bangkok Post