ក្រុមហ៊ុនធំមួយ បានស្នើសុំបង្កើតតំបន់សេដ្ឋកិច្ចពិសេស នៅស្រុកក្រគរ ខេត្តពោធិ៍សាត់ លើផ្ទៃដីទំហំជាង ១៤០ ហិកតា ខណៈគណៈកម្មការអន្តរក្រសួង-ស្ថាប័ន​ចំនួន ១៣ បានចុះពិនិត្យទីតាំងរួចរាល់។ នេះបើយោងតាមការចុះផ្សាយរបស់ ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី០៨ ខែកក្កដា ឆ្នាំ២០២៤។

ក្រុមហ៊ុនដែលបានស្នើសុំបង្កើតតំបន់សេដ្ឋកិច្ចខាងលើនេះ មានឈ្មោះថា Pursat Special Economic Zone Co., Ltd. ហើយគម្រោងនេះទៀតសោធ មានទីតាំងស្ថិតនៅក្បាលដីលេខ៤៦៦ ត្រង់គីឡូម៉ែត្រលេខ១៥៤​ ​លេីផ្លូវជាតិលេខ៥ ភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ លើផ្ទៃដីទំហំជាង ១៤០ ហិកតា។

ជាមួយគ្នានេះដែរ កាលពីថ្ងៃទី០៨​ ខែកក្កដា ឆ្នាំ២០២៤ ឯកឧត្តម​ ហេង សុខណាង អគ្គលេខាធិការរងគណៈកម្មាធិការវិនិយោគកម្ពុជា​ បានដឹកនាំគណៈកម្មការអន្តរក្រសួង-ស្ថាប័ន​ចំនួន ១៣ ចុះពិនិត្យទីតាំងនៃគម្រោងស្នេីសុំបង្កើតតំបន់សេដ្ឋកិច្ចពិសេស​ របស់ក្រុមហ៊ុន ខាងលើ ហើយបានបញ្ចបប្រកបដោយជោគជ័យ ដោយគណៈកម្មាការអន្តរក្រសួង បានពិនិត្យយ៉ាងម៉ត់ចត់ គ្រប់ជ្រុងជ្រោយ និងបានលើកឡើងនូវកាតព្វកិច្ចដែលក្រុមហ៊ុនត្រូវបំពេញឱ្យសមស្របតាមលក្ខណៈបច្ចេកទេស និងនីតិវិធីច្បាប់ជាធរមាន។

សូមជម្រាបថា ការស្នេីសុំគម្រោងវិនិយោគថ្មីនាពេលនេះ​ បង្ហាញអំពីភាពជោគជ័យក្នុងការរីកចម្រេីនរបស់សង្គមសេដ្ឋកិច្ចកម្ពុជា​ ជាពិសេស​ ការផ្តល់នូវជំនឿទុកចិត្តពីសំណាក់វិនិយោគិន មកលេីការដឹកនាំរបស់រាជរដ្ឋាភិបាលកម្ពុជា​៕

អត្ថបទ៖ លីនី