យោងតាមការចុះផ្សាយរបស់ ក្រុមប្រឹក្សាអភិវឌ្ឍន៍កម្ពុជា នាថ្ងៃទី០៧ ខែឧសភាព ឆ្នាំ២០២៤ នេះ បានឱ្យដឹងថា ក្នុងខែមេសា ឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងថ្មី និងគម្រោងពង្រីកផលិតកម្មចំនួន ២២គម្រោង ដែលមានទុនវិនិយោគសរុបប្រមាណជាង ៣០៩លានដុល្លារ និងអាចបង្កើតការងារបានប្រមាណ ២៣ពាន់កន្លែង។
ក្នុងចំណោមគម្រោងវិនិយោគទាំង ២២ គម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន ១៤គម្រោង និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន ៨គម្រោង។
បើតាមរបាយគម្រោងវិនិយោគនៅតាមបណ្ដារាជធានី-ខេត្ត ឃើញថា ខេត្តកំពង់ស្ពឺ ទទួលបានគម្រោងច្រើនជាងគេរហូតទៅដល់ ៧គម្រោង បន្ទាប់មកខេត្តស្វាយរៀងទទួលបាន ៦គម្រោង ខេត្តកណ្ដាល ៣គម្រោង ទីក្រុងភ្នំពេញ ៣គម្រោង ខេត្តព្រះសីហនុ ២គម្រោង និងបន្ទាយមានជ័យ ១គម្រោង។ គួរគូសរំលេចផងដែរថា ក្នុងខែមេសា ឆ្នាំ២០២៤ នេះ ការវិនិយោគមកពីប្រទេសចិនស្ថិតនៅលំដាប់លេខរៀងទី១ ដោយបានរួមចំណែករហូតទៅដល់ប្រមាណ ៩៨% នៃទុនវិនិយោគ៕
ប្រភព៖ ក្រុមប្រឹក្សាអភិវឌ្ឍន៍កម្ពុជា