យោងតាមចុះផ្សាយរបស់ក្រុមហ៊ុន Royal Railway Cambodia បានឱ្យដងថា រថភ្លើងល្បឿនលឿនជប៉ុន ត្រូវបានដឹកជញ្ជូនមកដល់កំពង់ផែក្រុងព្រះសីហនុហើយ នៅវេលាម៉ោង ១០ព្រឹក ថ្ងៃទី២៧ ខែមេសា ឆ្នាំ២០២៤ នេះ។

ក្រុមហ៊ុន Royal Railway Cambodia បានធ្វើការផុសនៅលើផេកផ្លូវការរបស់ខ្លួន នាប៉ុន្មានម៉ោងមុន ដោយរូបភាពរថភ្លើងល្បឿនលឿនជប៉ុន អមជាមួយនឹងខ្លឹមសារថា «ស្វាគមន៍សមាជិកថ្មី😍 Kiha 183 Snow Heavy បានមកដល់កំពង់ផែក្រុងព្រះសីហនុ ដោយសុវត្ថិភាពហើយ នៅវេលាម៉ោង១០ព្រឹក ថ្ងៃទី 27 ខែមេសា ឆ្នាំ2024នេះ »។

គួរបញ្ជាក់ផងដែរថា បើយោងតាមការចុះផ្សាយរបស់សារព័ត៌មានក្នុងស្រុកមួយ បានបញ្ជាក់ថា ក្រុមហ៊ុន Royal Railway Cambodia ដែលជាក្រុមហ៊ុន របស់​អ្នកឧកញ៉ា គិត ម៉េង បានទិញ​ក្បាល​​ម៉ាស៊ីន​រថភ្លើង​ល្បឿនលឿន​ចំនួន ១១​គ្រឿង ពី​ប្រទេសជប៉ុន។ ក្បាល​​​រថភ្លើង​​​ដឹក​អ្នកដំណើរ​ល្បឿនលឿន ចំនួន១១ គ្រឿងទាំនោះ គឺជាប្រភេទរថភ្លើងដែលអាចដំណើរការដោយខ្លួនឯង ដោយមិនចាំបាច់ប្រើក្បាលម៉ាស៊ីនរថភ្លើងសម្រាប់អូសទាញទូររថភ្លើងឡើយ៕

អត្ថបទ៖ លីនី
ប្រភព៖ ក្រុមហ៊ុន Royal Railway Cambodia