ពលរដ្ឋវៀតណាមច្រើនកុះករនាំគ្នាសម្រុកទៅទិញមាស នៅរសៀលថ្ងៃចន្ទ ទី១៩ ខែកុម្ភៈ នេះ ដែលពួកគេចាត់ទុកថា ថ្ងៃនេះជាថ្ងៃទេវតាទ្រព្យ “God of Wealth Day” ដើម្បីទទួលបានលាភសំណាង។

យោងតាមការចុះផ្សាយរបស់ សារព័ត៌មាន VNExpress បានឱ្យដឹងថា គិតត្រឹម ថ្ងៃត្រង់នេះ ហាងមាសទាំងនៅទីក្រុងហាណូយ និងទីក្រុងហូជីមិញ ទទួលបានអតិថិជនជាច្រើន ហើយកាលពីម៉ោង ១២ ថ្ងៃត្រង់នេះ គេប្រទះឃើញមានមនុស្សជាច្រើន ឈរ និងអង្គុយតម្រង់ជួរដើម្បីរង់ចាំទិញមាស។

ពលរដ្ឋ​វៀតណាមវ័យ 73 ឆ្នាំម្នាក់ បាននិយាយថា គាត់បានទៅហាងមាសមួយកន្លែង ដើម្បីទិញចិញ្ជៀនមាស ហើយគាត់តែងតែទិញមាសនៅថ្ងៃនេះ (ថ្ងៃនៃទេវតាទ្រព្យ “God of Wealth Day”) ជារៀងរាល់ឆ្នាំ​ដើម្បី​ទទួលបានសំណាងល្អ។ ជាមួយគ្នានេះដែរ ពលរដ្ឋវៀតណាម ពីររូបទៀតបានលើកឡើងថា ពួកគេបានទិញខ្សែដៃមាសថ្មី និងទិញមាស ដោយសង្ឃឹមថាទទួលបានសំណាងពេញមួយឆ្នាំ ហើយ​​អាជីវកម្ម​របស់ពួកគេរីក​ចម្រើន​សម្រាប់​ខែ​ខាង​មុខ។

សូមបញ្ជាក់ថា ជនជាតិវៀតណាមចូលចិត្តទិញមាស ដើម្បីប្រារព្ធថ្ងៃនៃទេវតាទ្រព្យ “God of Wealth Day ” ដែលជាថ្ងៃទីដប់នៃពិធីបុណ្យចូលឆ្នាំថ្មី ដូចដែលមាននៅក្នុងរឿងព្រេងនិទានថា ទេវតាទ្រព្យត្រឡប់ទៅកាន់ឋានសួគ៌នៅថ្ងៃទីដប់នៃខែទី១ តាមច័ន្ទគតិជារៀងរាល់ឆ្នាំ។ ជាមួយគ្នានេះដែរ ប្រជាជនវៀតណាមចាត់ទុកថ្ងៃនេះ ជាថ្ងៃទេវតាទ្រព្យ ដូច្នេះហើយ ពួកគេមានទំនៀមទម្លាប់ទិញមាសខ្លះ ដើម្បីនាំលាភសំណាង និងភាពរុងរឿងពេញមួយឆ្នាំ៕

អត្ថបទ៖ លីនី
ប្រភព៖ VNExpress , vietnamplus