វៀតណាម នឹងរកចំណូលបាន ១ពាន់លានដុល្លារពីការនាំចេញដូងនៅឆ្នាំនេះ ក្រោយប្រទេសចិន និងអាមេរិកបង្កើនការនាំចូល
សេដ្ឋកិច្ច June 5, 2023 Khmernote

សមាគមដូងវៀតណាមបាននិយាយថា វៀតណាមនឹងរកចំណូលបាន ១​ពាន់លានដុល្លារពីការនាំចេញដូងស្រស់ និងផលិតផលដែលផលិតពីផ្លែដូងនៅឆ្នាំនេះ ពោលគឺកើនឡើងពី ៩០០លានដុល្លារកាលពីឆ្នាំមុន ខណៈដែលប្រទេសចិនបានបង្កើនការនាំចូលផ្លែដូង ជាហេតុធ្វើឱ្យការនាំចេញរបស់វៀតណាមកើនឡើង។ នេះបើយោងតាមការចុះផ្សាយរបស់សារព័ត៌មាន Vnexpress។

លោក Nguyen Dinh Tung នាយកប្រតិបត្តិនៃក្រុមហ៊ុន Vina T&T Import-Export Company បាននិយាយថា ក្រុមហ៊ុនរបស់លោកបាននាំចេញដូងស្រស់ចំនួន ១៥កុងតឺន័រទៅកាន់សហរដ្ឋអាមេរិក អូស្ត្រាលី កូរ៉េខាងត្បូង និងជប៉ុនជារៀងរាល់ខែ ហើយការនាំចេញក៏កំពុងកើនឡើងផងដែរ។ ជាមួយគ្នានេះលោក Nguyen Van Thu ប្រធាន​ក្រុមហ៊ុន G.C Food Joint Stock Company ដែល​ជា​ម្ចាស់​ចម្ការ​ចាហួយ​ដូង​ធំ​ជាង​គេ​របស់​ប្រទេស​ បាន​និយាយ​ថា​ ក្រុមហ៊ុនរបសលោកមាន​ផែនការ​បង្កើន​ការ​នាំ​ចេញ ក្នុងនោះ​រួម​ទាំង​ចាហួយ​ផង​ដែរ។

ជាមួយគ្នានេះដែរ លោក Cao Ba Dang Khoa អគ្គលេខាធិការស្តីទីនៃសមាគមដូងវៀតណាមបានប្រាប់ VnExpress ថា ប្រទេសចិនចង់នាំចូលដូង និងផលិតផលដូងពីវៀតណាមតាមរយៈកូតាផ្លូវការ។ គាត់បានបន្ថែមថា អ្នកប្រើប្រាស់ជនជាតិចិនចូលចិត្តផលិតផលភាគច្រើនដែលផលិតពីដូង។ ដោយឡែកយោងតាមនាយកដ្ឋានការពាររុក្ខជាតិបានឱ្យដឹងថា សហរដ្ឋអាមេរិកនឹងពិចារណាអនុញ្ញាតឱ្យមានការនាំចូលផ្លែដូងស្រស់បន្ថែមទៀត ពីប្រទេសវៀតណាមនៅក្នុងឆមាសទីពីរនៃឆ្នាំនេះ។ គួរបញ្ជាក់ផងដែរថា កាលពីប្រាំឆ្នាំមុន វៀតណាមមិនស្ថិតនៅលើផែនទីនាំចេញដូងនៅលើសកលទេ ប៉ុន្តែឥឡូវនេះវៀតណាមបានក្លាយជាអ្នកនាំចេញដូង និងផលិតផលដូងធំបំផុតទីបួននៅអាស៊ីប៉ាស៊ីហ្វិក៕

អត្ថបទ៖ លីនី