ឡានដឹកផ្លែទុរេនជាង ៧០០គ្រឿងរបស់វៀតណាម កំពុងជាប់គាំងនៅព្រំដែនចូលទៅចិន ក្រោយប្រទេសចិនអនុញ្ញាតឱ្យនាំចូលទុរេនជាផ្លូវការ
សេដ្ឋកិច្ច June 2, 2023 Khmernote

ឡានដឹកទំនិញរបស់វៀតណាមប្រមាណជាង ៧០០គ្រឿង ដែលភាគច្រើនដឹកកសិផលទុរេន កំពុងជាប់គាំងនៅក្នុងខេត្ត Lang Son ប្រទេសវៀតណាម ខណៈរថយន្តដឹកទំនិញទាំងនេះកំពុងព្យាយាមសម្រុកចូលទៅប្រទេសចិន។ ការជាប់គាំងនេះ បណ្ដាលមកពី តម្រូវការខ្ពស់នៅក្នុងរដូវប្រមូលផលផ្លែឈើ។

លោក Hoang Khanh Duy អនុប្រធានការិយាល័យរដ្ឋាភិបាលដែលគ្រប់គ្រងច្រកព្រំដែន Lang Son បាននិយាយថា ការកកស្ទះបានបិទច្រកព្រំដែនភាគខាងជើងអស់រយៈពេលជាងមួយសប្តាហ៍ ជាពិសេសនៅច្រកទ្វារព្រំដែន Huu Nghi ខណៈការនាំចេញទុរេនស្រស់ទៅកាន់ប្រទេសចិនត្រូវបានអនុញ្ញាតជាផ្លូវការ។

លោក Duy បានបន្ថែមទៀតថា មន្ត្រីវៀតណាមបានស្នើឱ្យសមភាគីចិនរបស់ពួកគេធ្វើការបន្ថែមម៉ោង ដើម្បីបង្កើនចរាចរណ៍នៅ Huu Nghi ។ លើសពីនេះពួកគេក៏បានស្នើឱ្យច្រកទ្វារព្រំដែន Tan Thanh មានការអនុញ្ញាតឱ្យត្រួតពិនិត្យជាផ្លូវការនូវពាណិជ្ជកម្មទុរេន ខណៈ កាល​ពី​ថ្ងៃ​អង្គារ​ ឡានដឹកផ្លែទុរេន​ចំនួន​ ៦៣​គ្រឿង​បាន​ឆ្លង​កាត់​ច្រក​នេះ។

ទន្ទឹមនឹងនេះដែរ នាយករដ្ឋមន្ត្រី Pham Minh Chinh បានអំពាវនាវដល់ស្ថាប័នរដ្ឋាភិបាលនៅល្ងាចថ្ងៃពុធ ដើម្បីពន្លឿនការឆ្លងកាត់រថយន្តដឹកផលិតផលទៅកាន់ប្រទេសចិន។ លោកបានបន្ថែមថា នីតិវិធីគួរតែត្រូវបានធ្វើឱ្យសាមញ្ញ ដើម្បីបង្កើនការដឹកជញ្ជូន ដូច្នេះផ្លែឈើអាចនៅស្រស់បាន៕

អត្ថបទ៖ លីនី
ប្រភព៖ vnexpress