យោងតាមការចុះផ្សាយរបស់ក្រសួងព័ត៌មានបានឱ្យដឹងថា ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានគូសបញ្ជាក់ថា អង្ករកម្ពុជា គឺស្ថិតនៅក្នុងប្រភេទអង្ករដែលជាប់លេខ ១នៅលើពិភពលោកចំនួន ៥ដងរួចមកហើយ ដែលឥឡូវកំពុងស្ថិតនៅចំណាត់ថ្នាក់លេខ ១នៅឡើយ និងសង្ឃឹមថា អង្ករនេះនឹងទទួលបាននូវការពេញនិយមសម្រាប់ប្រជាជនម៉ាល់ឌីវផងនិងសម្រាប់អ្នកទេសចរដែលមកទស្សនកិច្ចនៅទីនេះផង ។ ការគូសបញ្ជាក់របស់សម្ដេចតេជោនាយករដ្ឋមន្រ្ដីនេះ ក្នុងសន្និសីទសារព័ត៌មានរួមគ្នាជាមួយឯកឧត្ដមប្រធានាធិបតីនៃសាធារណរដ្ឋម៉ាល់ឌីវ អ៊ីប្រាហ៊ីម ម៉ូហាមេដ សូលី (Ibrahim Mohamed Solih) នាព្រឹកថ្ងៃទី ១៦ ខែមករា ២០២៣ នៅវិមានរដ្ឋាភិបាលនៃប្រទេស ម៉ាល់ឌីវ។
សម្ដេចតេជោ ហ៊ុន សែន បានថ្លែងថា «ដោយសារអង្ករកម្ពុជាគឺស្ថិតនៅក្នុងប្រភេទអង្ករដែលជាប់លេខ ១ នៅលើពិភពលោកចំនួន ៥ដង ហើយឥឡូវកំពុងស្ថិតនៅចំណាត់ ថ្នាក់លេខ១ នៅឡើយ ហើយសង្ឃឹមថាអង្ករនេះនឹងទទួលបាននូវការពេញនិយម សម្រាប់ប្រជាជនម៉ាល់ឌីវផង និងសម្រាប់អ្នកទេសចរដែលមកទស្សនកិច្ចនៅទីនេះ»។
សម្ដេចតេជោលើកឡើងថា ក្រៅពីអង្ករ កម្ពុជាក៏ផលិតផលកសិកម្មផ្សេងទៀតដូចជាស្វាយចន្ទី ចេក និងស្វាយ ជាដើម ដែលអាចនាំចូលទៅកាន់ប្រទេសម៉ាល់ឌីវដើម្បីបំពេញតម្រូវការសម្រាប់ប្រជាជន ម៉ាល់ឌីវផង និងសម្រាប់បម្រើឱ្យវិស័យទេសចរណ៍នៅប្រទេសម៉ាល់ឌីវផង។ សម្ដេចតេជោសង្ឃឹមថា ក្រៅពីនោះ កម្ពុជានៅមានសម្លៀកបំពាក់ កម្ពុជាជាប្រទេសដែលផលិតសម្លៀកបំពាក់ដែលម៉ាល់ឌីវ អាចទទួលបាននូវការបញ្ជាទិញពីកម្ពុជាផងដែរ៕
ប្រភព៖ ក្រសួងព័ត៌មាន