កាសែត Financial Times បានរាយការណ៍កាលពីថ្ងៃចន្ទថា ប្រធានាធិបតីឥណ្ឌូនេស៊ី Joko Widodo កំពុងពិចារណាចូលរួមជាមួយឥណ្ឌា និងចិនក្នុងការទិញប្រេងពីរុស្ស៊ី ដើម្បីទូទាត់សម្ពាធកើនឡើងនៃថ្លៃថាមពល។ លោក Widodo បាននិយាយនៅក្នុងបទសម្ភាសន៍ជាមួយកាសែត Financial Times នៅពេលគាត់ត្រូវបានសួរថា តើប្រទេសឥណ្ឌូនេស៊ីនឹងទិញប្រេងពីរុស្ស៊ីដែរឬទេ? គាត់ថា ឥណ្ឌូនេស៊ីតែងតែតាមដានគ្រប់ជម្រើសទាំងអស់ បើមានប្រទេសណាផ្ដល់តម្លៃល្អ យើងនឹងទិញ។
គួររម្លឹកថា កាលពីខែសីហា រដ្ឋមន្ត្រីក្រសួងទេសចរណ៍លោក Sandiaga Uno បាននិយាយថា ឥណ្ឌូណេស៊ីត្រូវបានផ្តល់ប្រេងឆៅពីរុស្ស៊ីក្នុងការបញ្ចុះតម្លៃ ៣០%។ បន្ទាប់ពីរឿងនេះ ក្រុមហ៊ុនប្រេងរបស់រដ្ឋ Pertamina បាននិយាយថា ខ្លួនកំពុងពិនិត្យមើលហានិភ័យនៃការទិញប្រេងពីរុស្ស៊ី។
យ៉ាងណាមិញ កាលពីដើមខែនេះ លោក Widodo បានដំឡើងថ្លៃប្រេងឥន្ធនៈដែលបានឧបត្ថម្ភធនចំនួន ៣០ភាគរយ ហើយបាននិយាយថា ការដំឡើងថ្លៃគឺជា “ជម្រើសចុងក្រោយ” របស់គាត់ ដោយសារតែសម្ពាធសារពើពន្ធ ដែលបង្កឱ្យមានការតវ៉ានៅទូទាំងប្រទេសដែលមានប្រជាជន ២៧០លាននាក់៕
អត្ថបទ៖ លីនី
ប្រភព៖ channelnewsasia
រូបភាព៖ freemalaysiatoday, straitstimes, thestar