ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីថ្ងៃពុធ ម្សិលមិញថា៖ “រុស្ស៊ីមិនបានបាត់អ្វីនោះទេ ជុំវិញយុទ្ធនាការយោធារបស់ខ្លួននៅអ៊ុយក្រែន”។ ថ្លែងនៅក្នុងវេទិកាសេដ្ឋកិច្ចនៅទីក្រុង Vladivostok ភាគខាងកើតរបស់រុស្ស៊ី លោក ពូទីន បាននិយាយថា រាល់សកម្មភាពរបស់រុស្ស៊ីត្រូវបានរៀបចំឡើង ដើម្បីពង្រឹងអធិបតេយ្យភាពរបស់ប្រទេស ហើយមានគោលបំណង “ជួយប្រជាជន” ដែលរស់នៅក្នុងតំបន់ Donbas ភាគខាងកើតអ៊ុយក្រែន។

ប្រធានាធិបតីរុស្ស៊ី រូបនេះបានបន្តថា៖ “យើងមិនបានបាត់បង់អ្វីទាំងអស់ ហើយនឹងមិនមានការបាត់បង់អ្វីឡើយ។ បើ​និយាយ​ពី​អ្វី​ដែល​យើង​ទទួល​បាន ខ្ញុំ​អាច​និយាយ​បាន​ថា ផលប្រយោជន៍​សំខាន់ ​គឺ​ការ​ពង្រឹង​អធិបតេយ្យភាព​របស់​យើង​”។ ប៉ុន្តែយ៉ាងណាក៏ដោយ លោក ពូទីន បានទទួលស្គាល់ថា ការសម្រេចចិត្តរបស់ទីក្រុងមូស្គូ ក្នុងការបញ្ជូនកងទ័ពចូលទៅក្នុងប្រទេសអ៊ុយក្រែន បានបង្កើតឱ្យមាន “បន្ទាត់រាងប៉ូលជាក់លាក់មួយ ទាំងនៅក្នុងពិភពលោក និងក្នុងប្រទេស”។

គួររម្លឹកថា រុស្ស៊ីបានបញ្ជូនទាហានរាប់ម៉ឺននាក់ចូលទៅក្នុងអ៊ុយក្រែនកាលពីថ្ងៃទី២៤ ខែកុម្ភៈ ក្នុងអ្វីដែលខ្លួនហៅថាជាប្រតិបត្តិការពិសេសមួយ ហើយបានបង្កើត និងបន្តជាជម្លោះរាំរ៉ៃមកទល់ពេលបច្ចុប្បន្ននេះ៕

អត្ថបទ៖ លីនី
ប្រភព៖ yahoo
រូបភាព៖ lismorecitynews, deccanherald, yimg.com