លោក Mark Liu ជាប្រធានក្រុមហ៊ុន TSMC ដែលជា ក្រុមហ៊ុនផលិតបន្ទះឈីបឈានមុខគេរបស់ពិភពលោក បានផ្តល់កិច្ចសម្ភាសន៍ជាមួយទូរទស្សន៍ CNN ចំពោះបញ្ហាសំខាន់ថា ប្រសិនបើចិនសម្រេចចិត្តឈ្លានពានតៃវ៉ាន់នោះ លោក Mark Liu ទទូចថារោងចក្រផលិតបន្ទះឈីបដ៏ទំនើបបំផុតរបស់ពិភពលោកនឹងមិនអាចដំណើរការបានទេ ព្រោះការប្រើប្រាស់កម្លាំងយោធានឹងជះឥទ្ធិពលអោយរោងចក្រ TSMC មិនអាចដំណើរការបន្តបាន ដោយសារតែ ការផលិតបន្ទះឈីបគឺមានភាពស្មុគស្មាញ ទាមទារ​ឱ្យ​មាន​ការ​តភ្ជាប់​ពេល​វេលា​ពិត​ប្រាកដ​ជាមួយ​ប្រទេស​ផ្សេង​ទៀត​នៅ​ជុំវិញ​ពិភពលោក​ ទាំង​អឺរ៉ុប ជប៉ុន និង​សហរដ្ឋ​អាមេរិក​ខាង​សម្ភារៈ គីមី គ្រឿងបន្លាស់ វិស្វកម្ម​កម្មវិធី និងការវិភាគនៃបញ្ហាដែលអាចកើតមាន។

ក្នុង​បទ​សម្ភាស​ជាមួយ​ទូរទស្សន៍ CNN លើក​នេះ លោក Liu បាន​សង្កត់​ធ្ងន់​ថា «ប្រសិន​បើ​សង្គ្រាម​ផ្ទុះ​ឡើង និងការឈ្លានពានណាមួយដែលនាំអោយ លទ្ធផលចុងក្រោយគឺគ្មាននរណាម្នាក់ឈ្នះឡើយ ប៉ុន្តែ​មួយ​វិញ​ទៀត ភាគី​ទាំង​អស់​សុទ្ធ​តែ​ជា​អ្នក​ចាញ់​រួម​គ្នា ក្នុង​ពេល​ដំណាលគ្នា»។ ដោយភាព​តានតឹង​រវាង​ចិន និង​តៃវ៉ាន់​បាន​កើត​ឡើង​បន្ទាប់​ពី​ប្រធាន​សភា​អាមេរិក Nancy Pelosi បានទៅទស្សនាតៃវ៉ាន់ លោក Liu បាន​និយាយ​បន្តទៀតថា «ជម្លោះដែលអាចកើតឡើងនៅតៃវ៉ាន់ ជាមួយនឹងករណីការឈ្លានពានអ៊ុយក្រែនដោយរុស្ស៊ី ទោះបីជាជម្លោះទាំងពីរមានភាពខុសប្លែកគ្នាខ្លាំងក៏ដោយ ប៉ុន្តែ​ផល​ប៉ះពាល់​សេដ្ឋកិច្ច​មាន​លក្ខណៈ​ស្រដៀង​គ្នា ដូច្នេះហើយលោក Liu ចង់​ឲ្យ​មេដឹកនាំ​នយោបាយ​គេច​ពី​សង្គ្រាម​ដែលអាចកើតមានឡើងរាល់ករណីទាំងអស់។ ប្រធានក្រុមហ៊ុន TSMC បានបន្ថែមជាចុងក្រោយថា ការឈ្លានពានទឹកដីនេះបានបង្កឱ្យមានភាពចលាចលផ្នែកសេដ្ឋកិច្ចទាំងនៅក្នុងប្រទេសចិន និងតៃវ៉ាន់ ព្រមទាំងប្រទេសលោកខាងលិចទៀតផង។

គួរបញ្ជាក់អោយដឹងផងដែរថា៖ TSMC គឺជាក្រុមហ៊ុនផលិតបន្ទះឈីបដែលបង្កើតឡើងនៅតៃវ៉ាន់ ដែលត្រូវបានគេចាត់ទុកថាជាក្រុមហ៊ុនផលិតបន្ទះឈីបបច្ចេកវិទ្យាទំនើបបំផុតរបស់ពិភពលោក ថែមទាំងទទួលបន្ទុកផលិតបន្ទះឈីបសម្រាប់ក្រុមហ៊ុនធំៗក្នុងពិភពលោក រួមមាន Apple និង Qualcomm រួមទាំងក្រុមហ៊ុនធំ និងតូចជាច្រើនទៀតដឺលអាចពោលបានថាក្រុមហ៊ុននេះគឺមានឥទ្ធិពលដល់ការធ្វើចលនានៃឧស្សាហកម្មបន្ទះឈីបរបស់ពិភពលោកនឹងមិនខុសទេ៕

អត្ថបទ៖ Bee
ប្រភព៖ cnbc