ក្រសួងហិរញ្ញវត្ថុវៀតណាមបានអនុម័តលើផែនការរបស់ខ្លួនក្នុងការស្នើសុំរដ្ឋាភិបាលកាត់បន្ថយពន្ធលើការប្រើប្រាស់ពិសេស និងពន្ធលើតម្លៃបន្ថែម (value-added tax ឬ VAT) លើប្រេងសាំង ដើម្បីធ្វើឱ្យតម្លៃប្រេងធ្លាក់ចុះ។ ផែនការនេះត្រូវបានប្រកាសកាលពីថ្ងៃព្រហស្បតិ៍ ដោយមន្ត្រីក្រសួង ប៉ុន្តែមិនបានបង្ហាញព័ត៌មានលម្អិតបន្ថែមឡើយ។
រម្លឹកផងដែរថា កាលពីដើមខែនេះ ក្រសួងបានពិចារណាកាត់បន្ថយពន្ធបរិស្ថានពាក់កណ្តាលលើប្រេងឥន្ធនៈ ប៉ុន្តែអ្នករិះគន់បាននិយាយថា ការកាត់បន្ថយពី ៥០០ ទៅ ១,០០០ ដុង គឺតិចតួចពេក ហើយបានអំពាវនាវឱ្យកាត់បន្ថយពន្ធផ្សេងទៀត។
គួរបញ្ជាក់ថា បច្ចុប្បន្នពន្ធលើការប្រើប្រាស់ពិសេសគឺនៅកម្រិត ៨-១០% ហើយពន្ធលើតម្លៃបន្ថែមគឺនៅ ១០%។ ជាមួយគ្នានេះដែរ តម្លៃសាំងបានឡើងដល់តម្លៃខ្ពស់ជាងពេលណាៗទាំងអស់គឺ ៣២ ៨៧០ ដុង (១.៤១ ដុល្លារ) ក្នុងមួយលីត្រកាលពីថ្ងៃអង្គារ។ តម្លៃនេះបានកើនឡើងពី ៦៥ ទៅ ៧០ ភាគរយ ចាប់តាំងពីចុងឆ្នាំ២០២១ ដែលជះឥទ្ធិពលលើអ្នកប្រើប្រាស់ និងអាជីវកម្ម៕
អត្ថបទ៖ លីនី
ប្រភព៖ vnexpress