អ្នកវិភាគនៃធនាគារស៊ុយអ៊ែត (SEB) បាននិយាយថា តម្លៃប្រេងអាចកើនឡើងលើសពី ២០០ដុល្លារក្នុង ១បារ៉ែល ប្រសិនបើក្រុមប្រទេសទាំង ៧ (G7) សម្រេចចិត្តព្យាយាមកំណត់លើតម្លៃប្រេងឆៅ និងផលិតផលរបស់រុស្ស៊ី។ លោក Bjarne Schieldrop បាននិយាយថា ក្រុមប្រទេសទាំង៧ បានប្រកាសថ្មីៗនេះថាខ្លួនកំពុងស្វែងរកលទ្ធភាពកំណត់តម្លៃប្រេងរបស់រុស្ស៊ី ដើម្បីរឹតបន្តឹងលើចំណូលរបស់រុស្ស៊ីដែលយកទៅប្រើលើការឈ្លានពាននៅអ៊ុយក្រែន។
អ្នកវិភាគរូបនេះ បាននិយាយថា ផែនការនេះមើលមួយផ្នែកគឺល្អ ប៉ុន្តែមួយផ្នែកទៀតគឺមិនល្អឡើយ វាអាចជាគ្រោះមហន្តរាយនៅពេលនេះ ដោយសារកម្រិតនៃភាពតានតឹងខ្ពស់នៅក្នុងទីផ្សារប្រេង នឹងធ្វើឱ្យតម្លៃបានកើនឡើងច្រើនជាងទ្វេដងដល់ប្រហែល ១២០ដុល្លារ ក្នុងមួយបារ៉ែលនៅឆ្នាំនេះ។
ជាមួយគ្នានេះ លោកបានពន្យល់ថា តម្រូវការខ្លាំង និងការផ្គត់ផ្គង់ទាប បានធ្វើឱ្យអ្នកផលិតប្រេងដូចជា ប្រទេសរុស្ស៊ីនូវអំណាចដ៏សម្បើមក្នុងទីផ្សារក្នុងឆ្នាំនេះ។ ហើយលោកបាននិយាយថា រុស្ស៊ីអាចជ្រើសរើសមិនលក់ប្រេងរបស់ខ្លួន ប្រសិនបើតម្លៃកំណត់ចូលជាធរមាន។ ទន្ទឹមនឹងនេះដែរ ផែនការនេះអាចបណ្តាលឱ្យផលិតកម្មរបស់រុស្ស៊ីធ្លាក់ចុះដល់ទៅ ២លានបារ៉ែលក្នុងមួយថ្ងៃ ដែលនេះនឹងបង្កើនសម្ពាធលើទីផ្សារប្រេងដែលមានភាពតានតឹងរួចមកហើយ។
លោក Schieldrop ក៏បាននិយាយនៅក្នុងកំណត់ត្រាមួយកាលពីថ្ងៃពុធថា បណ្តាប្រទេស G7 នៅថ្ងៃនេះកំពុងបន់ស្រន់កុំឱ្យការនាំចេញប្រេងរបស់រុស្ស៊ីធ្លាក់ចុះ ព្រោះប្រសិនដូច្នេះមែន តម្លៃប្រេងនឹងកើនឡើងពីបច្ចុប្បន្ន ១១៧ ដុល្លារក្នុងមួយបារ៉ែល ទៅជាង ២០០ ដុល្លារក្នុងមួយបារ៉ែល។ គួរបញ្ជាក់ផងដែរថា រុស្ស៊ីផលិតប្រេងបានប្រហែល ១០លានបារ៉ែលក្នុងមួយថ្ងៃក្នុងខែឧសភា នេះបើយោងតាមការប៉ាន់ស្មានរបស់អ្នកវិភាគ៕
អត្ថបទ៖ លីនី
ប្រភព៖ yahoo