យោងតាមការបញ្ជាក់ពីមន្រ្តីជាន់ខ្ពស់ថៃមួយរូបបានឱ្យដឹងកាលពីថ្ងៃច័ន្ទថា ការនាំចេញផលិតផលដំឡូងមីរបស់ប្រទេសថៃនៅចន្លោះខែមករា និងមេសា បានកើនឡើង ២៨% ធៀបនឹងរយៈពេលដូចគ្នាកាលពីឆ្នាំមុន ខណៈដែលអ្នកនាំចេញស្វែងរកជម្រើសគ្រាប់ធញ្ញជាតិ ចំពេលមានវិបត្តិស្បៀងអាហារ ដែលកើតឡើងដោយការលុកលុយរបស់រុស្ស៊ីលើអ៊ុយក្រែន។
ជាមួយគ្នានេះដែរ ក្រសួងពាណិជ្ជកម្មថៃបាននិយាយថា ប្រទេសថៃ ដែលជាប្រទេសនាំចេញដំឡូងមីដ៏ធំរបស់ពិភពលោក បាននាំចេញដំឡូងមីចំនួន ៤.៦លានតោន និងផលិតផលផលិតពីដំឡូងមីរួមមាន៖ ដំឡូងមីផលិតជាគ្រាប់ និងម្សៅដំឡូងមី ដែលមាតម្លៃ ៥៤.៨ ពាន់លានបាត (ប្រមាណ ១.៥៤ពាន់លានដុល្លារ) ក្នុងរយៈពេល ៤ខែដំបូងនៃឆ្នាំនេះ កើនឡើង ២៨.២% ធៀបនឹងរយៈពេលដូចគ្នាកាលពីឆ្នាំមុន។ ក្នុងនោះ ជិត ៧០% នៃការនាំចេញគឺទៅកាន់ចិន ខណៈគោលដៅផ្សេងទៀតរួមមាន៖ ប្រទេសជប៉ុន ឥណ្ឌូនេស៊ី និងកូរ៉េខាងត្បូង។
មន្ត្រីពាណិជ្ជកម្មជាន់ខ្ពស់ Phithak Udomwichaiwat បាននិយាយថា “មានតម្រូវការកើនឡើងពីអ្នកទិញបរទេសក្នុងអំឡុងពេលវិបត្តិអ៊ុយក្រែន-រុស្ស៊ី ហើយពិភពលោកកំពុងបង្កើនទុនបម្រុងគ្រាប់ធញ្ញជាតិសម្រាប់ការប្រើប្រាស់” ។ លោកបានបន្ថែមថា សូម្បីតែឧស្សាហកម្មចំណីសត្វ និងថាមពល ក៏បានងាកទៅរកការនាំចូលផលិតផលដំឡូងមីជំនួស ដែលជំរុញឱ្យមានតម្រូវការ និងតម្លៃកើនឡើង។
គួរបញ្ជាក់ផងដែរថា ប្រទេសថៃកាលពីឆ្នាំមុនបានផលិតដំឡូងមីចំនួន ៣២.៥ លានតោន ដែលផលិតជាផលិតផលផ្សេងៗក្នុងនោះ ៣០% ទៅ ៣៥% គឺប្រើប្រាស់ក្នុងស្រុក។ ទិន្នន័យរបស់រដ្ឋាភិបាលបង្ហាញថា ប្រទេសនេះបាននាំចេញផលិតផលដំឡូងមីមានតម្លៃ ១២៣ ពាន់លានបាត៕
អត្ថបទ៖ លីនី
ប្រភព៖ bangkokpost