យោងតាមការចុះផ្សាយរបស់សារព័ត៌មាន vietnamplus បានឱ្យដឹងថា សេដ្ឋកិច្ចហ្វីលីពីនបានធ្លាក់ចុះជាងការរំពឹងទុកក្នុងត្រីមាសទី១ ឆ្នាំ២០២១ នេះ ដោយគាំទ្រដល់ទស្សនៈដែលថាធនាគារកណ្តាលនឹងរក្សាអត្រាការប្រាក់ទាបបំផុតនៅក្នុងកិច្ចប្រជុំគោលនយោបាយដែលគ្រោងនឹងធ្វើឡើងនៅថ្ងៃទី ១២ ខែឧសភា។
ទីភ្នាក់ងារស្ថិតិហ្វីលីពីនបានបង្ហាញកាលពីថ្ងៃទី ១១ ឧសភាថា ផលិតផលក្នុងស្រុកសរុបបានធ្លាក់ចុះ ៤.២% នៅក្នុងត្រីមាសទី១ ធៀបនឹងរយៈពេលដូចគ្នាកាលពីឆ្នាំមុន ដែលជាការធ្លាក់ចុះ ៥ត្រីមាសជាប់ៗគ្នា ស្របពេលដែលមានវិធានការបិទខ្ទប់ដោយសារការរីករាលដាលនៃជំងឺរាតត្បាត។
ជាមួយគ្នានេះដែរក្នុងចំណោមវិស័យសេដ្ឋកិច្ចសំខាន់ៗ វិស័យកសិកម្មបានធ្លាក់ចុះ ១.២% ខណៈសេវាកម្មធ្លាក់ចុះ ៤.៤% និងឧស្សាហកម្មបានធ្លាក់ចុះ ៤.៧%។ ដោយឡែកចំពោះតម្រូវការការប្រើប្រាស់ក្នុងគ្រួសារបានធ្លាក់ចុះ ៤.៨% ប៉ុន្តែការចំណាយរបស់រដ្ឋាភិបាលបានកើនឡើង ១៦.១%។
ទោះជាយ៉ាងណា លទ្ធផលសេដ្ឋកិច្ចរបស់ប្រទេសនេះបានកើនឡើង ០.៣% បើធៀបនឹងត្រីមាសមុន។ លេខាធិការនៃអាជ្ញាធរសេដ្ឋកិច្ចនិងអភិវឌ្ឍន៍ជាតិលោក Karl Chua បាននិយាយនៅក្នុងសន្និសីទកាសែតមួយថា ជំហរសេដ្ឋកិច្ចរឹងមាំរបស់ប្រទេសនេះមុនពេលរាតត្បាតនិងការធ្វើឱ្យប្រសើរឡើងនូវទិន្នន័យសេដ្ឋកិច្ចនៅក្នុងប៉ុន្មានខែថ្មីៗនេះបង្ហាញថា សេដ្ឋកិច្ចរបស់ប្រទេសនេះកំពុងស្ថិតក្នុងស្ថានភាពល្អប្រសើរ។
ទន្ទឹមនឹងនោះធនាគារកណ្តាលហ្វីលីពីនត្រូវបានគេព្យាករថានឹងរក្សាអត្រាការប្រាក់គោលរបស់ខ្លួនឱ្យនៅដដែលក្នុងអត្រាទាបបំផុត ២,០ភាគរយសម្រាប់រយៈពេលនៅសល់នៃឆ្នាំ ២០២១ នេះ បើទោះបីជាអតិផរណាខ្ពស់បានបំពានទៅលើចំនួនគោលដៅពី ២ ទៅ ៤ភាគរយក៏ដោយ៕
អត្ថបទ៖ លីនី
ប្រភព៖ vietnamplus