ធនាគារជីប ម៉ុង ខមមើសល ប៊ែង ដែលកាលពីថ្ងៃទី១៤ ខែកុម្ភៈ ឆ្នាំ២០២០ នេះ បានដាក់សម្ភោធដំណើរការជាផ្លូវការនៅសាខាថ្មីរបស់ខ្លួនរហូតដល់ទៅពីរទីតាំងក្នុងពេលតែមួយ ដោយផ្តោតសំខាន់លើការប្រើប្រាស់ប្រព័ន្ធឌីជីថល និងប្រព័ន្ធបច្ចេកវិទ្យាសុទ្ធសាធ សម្រាប់ប្រតិបត្តិការហិរញ្ញវត្ថុផ្សេងៗ រាប់ចាប់ពីការបើកគណនីធនាគារ រហូតដល់ការទូរទាត់ផ្សេងៗជាប្រចាំថ្ងៃ។ បន្ទាប់ពីបោះជំហានចូលក្នុងវិស័យធនាគារកាលពីឆ្នាំ២០១៨ ដោយទទួលបានអាជ្ញាប័ណ្ណពីធនាគារជាតិនៃកម្ពុជាកាលពីខែឧសភា មកទល់ពេលនេះធានាគារជីប ម៉ុង បានបើកដំណើរការបាន ៧ សាខាដែលកំពុងបម្រើសេវាកម្មជូនអតិថិជន។
ស្របពេលកម្ពុជាមានការវិវត្តន៍ឥតឈប់ឈរ នៃវិស័យបច្ចេកវិទ្យាហិរញ្ញវត្ថុ និងកំណើននៃចំនួនប្រតិបត្តិការក៏ដូចជាទំហំទឹកប្រាក់ នៃសេវាធនាគារអេឡិចត្រូនិក ធនាគារជីប ម៉ុង បានបង្ហាញមហិច្ឆតាក្នុងការបើកសាខាឲ្យបានចំនួន ២៥ នៅទូទាំងប្រទេស និងបង្កើតភ្នាក់ងារធនាគារឲ្យបាន ៥០០ ភ្នាក់ងារនៅក្នុងឆ្នាំ២០២០ នេះ ដែលនឹងជួយសម្រួលដល់ការធ្វើប្រតិបត្តិការរបស់អតិថិជនឲ្យមានភាពរហ័ស សុវត្ថិភាព ចំណេញទាំងពេលវេលា និងថវិកា ដល់ប្រជាជនពលរដ្ឋកម្ពុជា។
ថ្លែងនៅក្នុងពិធីសម្ភោធជាផ្លូវការលោកឧកញ៉ា លាង ម៉េង បានលើកឡើងថា៖ « គោលដៅទី១ ក្នុងឆ្នាំ២០២០ យើងចង់ឲ្យមានសាខាធនាគារចំនួន ២៥ សាខាទូទាំងប្រទេស និងចង់មានផ្នែកភ្នាក់ងារធនាគារចំនួន ៥០០ ប៉ុន្តែយើងគិតថាអាចនឹងសម្រេចបានមិនដល់ចំនួនដែលគ្រោងទុកទាំង ៥០០ ភ្នាក់ងារក្នុងឆ្នាំនេះនោះទេ ដោយសារយើងចង់ពង្រឹងនូវគុណភាព និងចង់ឲ្យភ្នាក់ងារទាំងអស់រក្សាដើមទុនឲ្យបានច្រើន ដើម្បីផ្ដល់សេវាកម្មជូនអតិថិជនបានល្អ »។
គួរបញ្ជាក់ផងដែរថា ធនាគារជីប ម៉ុង ជាបុត្រសម្ព័ន្ធថ្មីមួយរបស់ក្រុមហ៊ុន ជីប ម៉ុង គ្រុបដែលត្រូវបានបង្កើតឡើងនៅក្នុងឆ្នាំ១៩៨២ ពីជំនួញលក់ដែកអេតចាយចាស់ៗ ហើយមកទល់បច្ចុប្បន្ននេះជីបម៉ុងគ្រុប មានដៃជើងដែលជាក្រុមហ៊ុនបុត្រសម្ព័ន្ធសឹងតែគ្រប់វិស័យតែម្តង មិនថាដែក សំណង់ ម្ហូបអាហារ លំនៅដ្ឋានហើយថ្មីៗនេះគឺ វិស័យធនាគារ ដែលបានបើកដំណើរការនៅក្នុងឆ្នាំ២០១៨ បន្ទាប់ទទួលបានអាជ្ញាប័ណ្ណពីធនាគារជាតិនៃកម្ពុជា ដែលតម្រូវឲ្យមានដើមទុនយ៉ាងហោចណាស់ ៧៥លានដុល្លារអាមេរិកដើម្បីប្រតិបត្តិការនៅក្នុងប្រទេសកម្ពុជា៕
អត្ថបទ៖ លីនី