ខេត្តសៀមរាបនឹងមានរោងចក្រប្រព្រឹត្តកម្មទឹកស្អាតបន្ថែមទៀត បន្ទាប់ពីរោងចក្រប្រព្រឹត្តកម្មទឹកស្អាតទឹកវិលទី២ បានដាក់ឲ្យប្រើប្រាសជាផ្លូវការកាលពីដើមសប្ដាហ័កន្លងទៅនេះ ដើម្បជួយបំពេញតម្រូវការរបស់ប្រជាពលរដ្ឋបានមួយកម្រិត។ ការអះអាងនេះត្រូវបានលើកឡើងដោយ ឯកឧត្ដមកិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ នៅក្នុងពិធីសម្ភោធដាក់ឲ្យប្រើប្រាស់ជាផ្លូវការ រោងចក្រប្រព្រឹត្តិកម្មទឹកស្អាតទឹកវិលទី២ របស់រដ្ឋាករទឹកស្វយ័តខេត្តសៀមរាប។
ជាមួយគ្នានេះដែរឯកឧត្ដមកិត្តិសេដ្ឋាបណ្ឌិត ទេសរដ្ឋមន្រ្តី ព្រមទាំងរដ្ឋាករទឹកស្វយ័តខេត្តសៀមរាបបានប្ដេជ្ញាថានឹងបន្តខិតខំប្រឹងប្រែងដើម្បីផ្ដល់សេវាកម្មទឹកស្អាតឲ្យបាន ១០០% ក្នុងក្រុងសៀមរាប ដោយឯកឧត្ដមបានលេីកនូវគម្រោងមួយចំនួនទៀតដែលនឹងត្រូវអនុវត្តជាបន្តបន្ទាប់។ ក្នុងនោះផងដែរជាលទ្ធផល រដ្ឋាករទឹកស្វ័យតសៀមរាបមានគម្រោងវិនិយោគមួយផ្សេងទៀត ក្រោមក្របខ័ណ្ឌឥណទានរបស់អង្គការ JICA ជប៉ុន ដែលមានទឹកប្រាក់ប្រមាណ ១០៦ លានដុល្លារក្នុងសមត្ថភាពផលិត ៦ម៉ឺនម៉ែត្រត្រីគុណក្នុងមួយថ្ងៃ ស្ថិតក្នុងសង្កាត់ជ្រាវ ខេត្តសៀមរាប ដោយយកប្រភពទឹកពីបឹងទន្លេសាប។
គួរបញ្ជាក់ផងដែរបច្ចុប្បន្នត្រូវការទឹកស្អាតនៅក្នុងក្រុងសៀមរាបបានកើនឡើងប្រមាណ ៦ម៉ឺនម៉ែត្រត្រីគុណក្នុងមួយថ្ងៃស្របពេលដែលការផ្គត់ផ្គង់របស់រដ្ឋាករទឹកស្អាតស្វយ័តសៀមរាបមានតែ ៣ ម៉ឺនម៉ែត្រត្រីគុណក្នុងមួយថ្ងៃ។ ដូច្នេះហើយការខិតខំប្រឹងប្រែងទាំងនេះមិនត្រឹមតែដេីម្បីត្រៀមដោះស្រាយការផ្គត់ផ្គង់ទឹកស្អាតជូនប្រជាពលរដ្ឋ និងបម្រើដល់ការអភិវឌ្ឍវិស័យសេដ្ឋកិច្ច និងទេសចរណ៍ ដែលនឹងមានការរីកចម្រើនកាន់តែខ្លាំងថែមទៀតនៅឆ្នាំបន្តបន្ទាប់ខាងមុខប៉ុណ្ណោះទេ។
អ្វីដែលជាចំណុចសំខាន់ត្រូវយកចិត្តទិកដាក់គឺ បានកាត់បន្ថយនូវការប្រើប្រាស់ទឹកទឹកក្រោមដី តាមទម្លាប់របស់ប្រជាពលរដ្ឋដោយពុំបានឆ្លងកាត់ប្រពន្ធសម្អាត និងត្រួតពិនិត្យគុណភាពពីមន្ទីរពិសោធន៍ធ្វេីឲ្យប៉ះពាល់ដល់សុខភាព។ លើសពីនេះគឺការបូមទឹកក្រោមដីកាន់តែច្រេីនដោយម្ចាស់ទីតាំងមួយចំនួន និងប្រជាពលរដ្ឋក្នុងក្រុងសៀមរាបនឹងធ្វេីឲ្យខូចស្រទាប់ទឹកក្រោមដីដែលអាចបង្កផលប៉ះពាល់ដល់ប្រាង្គប្រាសាទនៃតំបន់អង្គរដែលជាសម្បត្តិវប្បធម៌ដ៏មានតម្លៃវិសេសវិសាលរបស់ជាតិ៕
អត្ថបទ៖ លីនី