យោងតាមរបាយការណ៍ដែលចេញដោយក្រសួងកសិកម្ម រុក្ខប្រម៉ាញ់និងនេសាទបានឲ្យដឹងថាផលិតផលជ័រកៅស៊ូ និងការនាំចេញនៅក្នុងនព្វមាស ឆ្នាំ២០១៩ ឬ ក្នុងរយៈពេល ៩ខែដំបូង ឆ្នាំ២០១៩ នេះមានការកើនឡើង បើធៀបនឹងរយៈពេលដូចគ្នាកាលពីឆ្នាំ ២០១៨ ប៉ុន្តែតម្លៃនៅក្នុងឆ្នាំនេះបែរជាធ្លាក់ចុះ ជាងឆ្នាំ ២០១៨។
នៅក្នុងរបាយការណ៍ដែលចេញដោយក្រសួងបានបង្ហាញថាក្នុងរយៈពេល ៩ខែ ឆ្នាំនេះផលិតផលជ័រកៅស៊ូឈានដល់ចំនួន ១៧៥,២៨១ តោន ដែលបានកើនឡើងចំនួន ៣៥,៨០៧ តោនស្មើនឹង ២៦% ខណៈដែលបរិមាណនៃការនាំចេញមានចំនួន ១៧៣,០៧២ តោន កើនឡើង ៣២,៧២៥ ស្មើនឹង ២៣% ធៀបនឹងរយៈពេលដូចគ្នាកាលពីឆ្នាំ ២០១៨ ។ ដោយឡែកក្នុងរយៈពេល ៩ខែ តម្លៃកៅស៊ូបានធា្លក់ចុះ ២% បើធៀបទៅនឹងឆ្នាំមុន ដោយតម្លៃទូទៅជាមធ្យម ១,៣៣៥ ដុល្លារក្នុងមួយតោន តែក្នុងឆ្នាំនេះតម្លៃជាមធ្យមរបស់កៅស៊ូមានត្រឹមតែ ១,៣០៣ ដុល្លារក្នុងមួយតោនប៉ុណ្ណោះ។
យ៉ាងណាមិញសូមរំលឹកផងដែរថាកាលពីឆ្នាំ២០១៨ កម្ពុជាបាននាំចេញជ័រកៅស៊ូជាង ២១ម៉ឺនតោន ទៅក្រៅប្រទេស ក្នុងនោះការនាំចេញរួមមានទៅកាន់ប្រទេសចិន វៀតណាម សង្ហឹបុរី និងម៉ាឡេស៊ី ដោយទទួលបានចំណូលជិត៣០០លានដុល្លារ៕
អត្ថបទ៖ លីនី