នៅថ្ងៃទី០៣ ខែតុលា ឆ្នាំ២០១៩ ក្រុមហ៊ុន ហ្គោលដេន អេហ្វអិកស៍ លីង ឃែភីថល បានចូលរួម និងចែករំលែកចំណេះដឹង ជំនាញ ក៏ដូចជាបទពិសោធន៍របស់ខ្លួននៅខេត្តកំពត ដែលជាគោលដៅទី២នៃសិក្ខាសាលាតាមបណ្ដាខេត្តឆ្នាំ២០១៩ ដែលត្រូវបានរៀបចំឡើងដោយគណៈកម្មការមូលបត្រកម្ពុជា និងក្រុមហ៊ុនសមភាគីកណ្តាល ខេមបូឌាន ដេរីវ៉េទីវ អុិចឆេង។ ជាមួយនឹងប្រធានបទ «អ្វីជាការជួញដូរឧបករណ៍និស្សន្ទ៖ ការត្រៀមខ្លួន ការវិនិយោគ និងការយល់ដឹងពាក់ព័ន្ធ?» សិក្ខាសាលាតាមបណ្ដាខេត្ត ផ្ដោតជាចម្បងទៅលើការផ្សព្វផ្សាយនិងពង្រីកការយល់ដឹងអំពីការវិនិយោគលើឧបករណ៍និស្សន្ទនៅទូទាំងប្រទេសកម្ពុជា បង្កើនទំនុកចិត្តរបស់វិនិយោគិន និងអនុញ្ញាតឱ្យពួកគាត់ត្រៀមខ្លួនរួចរាល់សម្រាប់ការវិនិយោគលើឧបករណ៍និស្សន្ទ ដែលជាផលិតផលហិរញ្ញវត្ថុដ៏ពេញនិយមមួយ។
ឯកឧត្ដម សុខ ដារ៉ា អគ្គនាយករងនៃគណៈកម្មការមូលបត្រកម្ពុជា បានផ្ដល់កិត្តិយសប្រកាសបើកកម្មវិធីសិក្ខាសាលាតាមបណ្ដាខេត្តឆ្នាំ២០១៩នេះ។ ឯកឧត្ដម បានគូសបញ្ជាក់ពីបេសកកម្មរបស់គណៈកម្មការមូលបត្រកម្ពុជាក្នុងការពង្រឹងបទបញ្ញត្តិសម្រាប់ទីផ្សារឧបករណ៍និស្សន្ទនៅកម្ពុជា និងបានលើកទឹកចិត្តឱ្យវិនិយោគិនបង្កើនចំណេះដឹង ត្រៀមខ្លួនរួចរាល់ ក៏ដូចជាជ្រើសរើសក្រុមហ៊ុនដែលទទួលបានអាជ្ញាបណ្ណពីគណៈកម្មការមូលបត្រកម្ពុជា ដើម្បីបញ្ចៀសហានិភ័យ។ ឯកឧត្ដម ក៏បានសរសើរក្រុមហ៊ុន ហ្គោលដេន អេហ្វអិកស៍ លីង ឃែភីថល ដែលតែងតែមានភាពសកម្មក្នុងការលើកស្ទួយស្ដង់ដារនៃការជួញដូរឧបករណ៍និស្សន្ទ និងអនុវត្តគោលការណ៍ការពារវិនិយោគិន។
ក្នុងនាមជាវាគ្មិនកិត្តិយស លោក ចេង តារាវុធ ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល បានសម្តែងភាពសប្បាយរីករាយក្នុងការចូលរួមក្នុងសិក្ខាសាលាតាមបណ្ដាខេត្តឆ្នាំ២០១៩ ជាមួយគណៈកម្មការមូលបត្រកម្ពុជា។ គាត់ ក៏បានធ្វើបទបង្ហាញស្តីពី «យុទ្ធសាស្រ្តក្នុងការជួញដូរឧបករណ៍និស្សន្ទ» ដែលផ្តោតទៅលើចំណេះដឹងអំពីការជួញដូរផលិតផលឧបករណ៍និស្សន្ទ ការទប់ស្កាត់និងការកាត់បន្ថយហានិភ័យពីការវិនិយោគ និងយុទ្ធសាស្រ្តល្អៗដើម្បីទាញយកផលគាប់ប្រសើរពីការវិនិយោគ។
លទ្ធផលនៃសិក្ខាសាលាតាមបណ្ដាខេត្តនៅខេត្តកំពត បានបង្ហាញនូវភាពជោគជ័យគួរឱ្យកត់សម្គាល់ ដោយទទួលបានមិនត្រឹមតែការចូលរួមយ៉ាងច្រើនកុះករប៉ុណ្ណោះទេ ថែមទាំងការគាំទ្រ និងកំណើននៃចំណេះជំនាញរបស់សិក្ខាកាម។ ក្រោយពីចូលរួមសិក្ខាសាលាក្នុងខេត្តកំពតនេះ ក្រុមហ៊ុននឹងបន្តចូលរួមសិក្ខាសាលានៅគ្រប់គោលដៅទាំងអស់នៃសិក្ខាសាលាតាមបណ្ដាខេត្តឆ្នាំ២០១៩។