អង្គការពាណិជ្ជកម្មពិភពលោកបានកាត់បន្ថយការព្យាករណ៍កំណើនសេដ្ឋកិច្ចសកលរបស់ខ្លួនសម្រាប់ឆ្នាំនេះមកនៅកម្រិតខ្សោយបំផុតក្នុងរយៈពេលមួយទសវត្សរ៍ដោយព្រមានថា ពន្ធបន្ថែមទៀតនៅក្នុងបរិយាកាសនៃភាពមិនប្រាកដប្រជាខ្ពស់អាចបង្កឲ្យមាន “វដ្តនៃការបំផ្លាញចោល” ។ ជាមួយគ្នានេះដែរអង្គការពាណិជ្ជកម្មពិភពលោកបាននិយាយនៅក្នុងរបាយការណ៍មួយថា “ ទំហំពាណិជ្ជកម្មទំនិញនឹងកើនឡើង ១.២% នៅឆ្នាំនេះនិង ២.៧% នៅឆ្នាំក្រោយបន្ទាប់ពីមានការកើនឡើង ៣% កាលពីឆ្នាំ ២០១៨” ។

ចក្ខុវិស័យនេះបង្ហាញពីការធ្លាក់ចុះយ៉ាងខ្លាំងពីការព្យាករណ៍ពីមុនរបស់អង្គការពាណិជ្ជកម្មពិភពលោកកាលពីខែមេសា នៅពេលអង្គការដែលមានមូលដ្ឋាននៅទីក្រុងហ្សឺណែវបានព្យាករណ៍ថានឹងកើនឡើង ២.៦% នៅក្នុងពាណិជ្ជកម្មពិភពលោកនៅក្នុងឆ្នាំ ២០១៩ និង ៣% នៅឆ្នាំបន្ទាប់។ លើសពីនេះវាក៏គូសបញ្ជាក់ពីហានិភ័យដែលប្រឈមមុខនឹងពាណិជ្ជកម្មអន្តរជាតិផងដែរ នៅពេលដែលសហរដ្ឋអាមេរិកគំរាមកំហែងពន្ធបន្ថែមលើការនាំចូលរបស់ចិន និងរៀបចំការអនុគ្រោះពន្ធថ្មីរបស់អង្គការពាណិជ្ជកម្មពិភពលោកលើទំនិញពីសហភាពអឺរ៉ុប។

យ៉ាងណាមិញអគ្គនាយកអង្គការពាណិជ្ជកម្មពិភពលោកបាននិយាយនៅក្នុងសេចក្តីថ្លែងការណ៍មួយថា “ ទស្សនវិស័យដ៏ខ្មៅងងឹតសម្រាប់ពាណិជ្ជកម្មកំពុងតែបាក់ទឹកចិត្ត ប៉ុន្តែមិនមែនជាការរំពឹងទុកទេ” ។ ខណៈដែលការប៉ះទង្គិចពាណិជ្ជកម្មបង្កឲ្យមានភាពមិនប្រាកដប្រជាដែលធ្វើឲ្យអាជីវកម្មមួយចំនួនពន្យារពេលការវិនិយោគ បង្កើនផលិតភាពដែលចាំបាច់ដើម្បីលើកកម្ពស់កម្រិតជីវភាព។ ហើយការបង្កើតការងារក៏អាចត្រូវបានរារាំងផងដែរនៅពេលក្រុមហ៊ុនជួលកម្មករតិចជាងមុន ដើម្បីផលិតទំនិញនិងសេវាកម្មសម្រាប់នាំចេញ។

បន្ថែមពីនេះរបាយការណ៍របស់អង្គការពាណិជ្ជកម្មពិភពលោកក៏បានលើកឡើងពីហានិភ័យផ្សេងៗចំពោះកំណើនពាណិជ្ជកម្មរួមមាន ការកើនឡើងនូវភាពតានតឹងពាណិជ្ជកម្ម ភាពមិនប្រាកដប្រជាទាក់ទងនឹងការដកខ្លួនចេញរបស់អង់គ្លេសនៅក្នុងសហភាពអឺរ៉ុប និងការផ្លាស់ប្តូរជំហរគោលនយោបាយរូបិយវត្ថុនៅក្នុងសេដ្ឋកិច្ចអភិវឌ្ឍន៍។ ជាក់ស្ដែងនេះជាឆ្នាំទី៣ ជាប់ៗគ្នាមកហើយ ដែលអង្គការពាណិជ្ជកម្មពិភពលោកបានកាត់បន្ថយការរំពឹងទុករបស់ខ្លួនចំពោះកំណើនពាណិជ្ជកម្មពិភពលោក និងឆ្លុះបញ្ចាំងយ៉ាងទូលំទូលាយពីការយល់ឃើញស្រដៀងគ្នាពីធនាគារពិភពលោក និងមូលនិធិរូបិយវត្ថុអន្តរជាតិ។

ដោយឡែកកាលពីខែមុនអង្គការសហប្រតិបត្តិការ និងអភិវឌ្ឍន៍ដែលមានមូលដ្ឋាននៅទីក្រុងប៉ារីសបានលើកឡើងថា ជម្លោះពាណិជ្ជកម្មកាន់តែខ្លាំងឡើងៗ នៅលើពិភពលោកបានបង្កឲ្យមានកំណើនសេដ្ឋកិច្ចធ្លាក់ចុះដល់កម្រិតដែលមិនធ្លាប់មានចាប់តាំងពីវិបត្តិហិរញ្ញវត្ថុមួយទសវត្សរ៍កន្លងមក។ ហើយតួលេខដែលបានពិនិត្យឡើងវិញរបស់អង្គការពាណិជ្ជកម្មពិភពលោកកាលពីថ្ងៃអង្គារ តំណាងឲ្យការវាស់ស្ទង់ដ៏សំខាន់នៃភាគហ៊ុនពាក់ព័ន្ធ នឹងកិច្ចខិតខំប្រឹងប្រែងរបស់ប្រធានាធិបតីអាមេរិក លោក ដូណាល់ ត្រាំ ក្នុងការធ្វើឲ្យប្រសើរឡើងវិញនូវទំនាក់ទំនងពាណិជ្ជកម្មរបស់អាមេរិកនៅជុំវិញពិភពលោក។

ជាមួយគ្នានេះចាប់តាំងពីរបាយការណ៍ចុងក្រោយរបស់អង្គការពាណិជ្ជកម្មពិភពលោក (WTO) លោក ត្រាំ បានបង្កើនការប្រយុទ្ធប្រឆាំងជាមួយប្រទេសចិន ហើយពន្ធគយពន្ធអាករលើទឹកដីបានបន្តថ្លឹងថ្លែងលើកំណើនសេដ្ឋកិច្ចពិភពលោក។ ទន្ទឹមនឹងនេះលោក Trump អាចនឹងកំណត់ពន្ធថ្មីលើទំនិញអឺរ៉ុបដែលមានតម្លៃ ៨ ពាន់លានដុល្លារដែលកើតចេញពីជម្លោះដែលមានអាយុកាល ១៥ ឆ្នាំមកហើយលើជំនួយរដ្ឋខុសច្បាប់ដែលបានផ្តល់ដល់ក្រុមហ៊ុនផលិតយន្តហោះ Airbus SE ។

ដូច្នេះគណៈកម្មការអឺរ៉ុបកំពុងរៀបចំផែនការដើម្បីសងសឹកជាបន្ទាន់ជាមួយនឹងពន្ធគយលើការនាំចេញរបស់សហរដ្ឋអាមេរិកដែលមានតំលៃជាង ៤ ពាន់លានដុល្លារដោយសំអាងថា ជាហេតុផលនៃជម្លោះរបស់អង្គការពាណិជ្ជកម្មពិភពលោកលើការឧបត្ថម្ភធនដែលហាមឃាត់ពីពីរទស្សវត្សមុន។ គួរបញ្ជាក់ផងដែរថា​របាយការណ៍របស់អង្គការពាណិជ្ជកម្មពិភពលោកបានបង្ហាញថា ហានិភ័យចំពោះការព្យាករណ៍ត្រូវបានគិតគូរយ៉ាងខ្លាំងចំពោះការធ្លាក់ចុះ និងគ្របដណ្តប់ដោយគោលនយោបាយពាណិជ្ជកម្ម ៕

អត្ថបទ៖ លីនី​