ជាការពិតណាស់មនុស្សគ្រប់រូបសុទ្ធតែចាប់ផ្ដើមពីការងារដំបូងនៅក្នុងជីវិត មុនពេលដែលពួកគេទទួលបានជោគជ័យ សូម្បីតែមហាសេដ្ឋីលំដាប់ពិភពលោក បុគ្គលល្បីៗជាច្រើនក៏ដោយសុទ្ធតែធ្លាប់ឆ្លងកាត់ការងារដំបូងទាំងអស់ ទម្រាំបន្តជំហ៊ានមកដល់បច្ចុប្បន្ន។ ដោយឡែកវាគ្រាន់តែខុសប្លែកពីគ្នានៃប្រភេទការងារដែលពួកគេទទួលបានប៉ុណ្ណោះ ជាក់ស្ដែងដើម្បីកាន់តែច្បាស់ខាងក្រោមនេះជាមហាសេដ្ឋីលំដាប់ពិភពលោក និងបុគ្គលល្បីៗចំនួន ៥ រូបដែលចាប់ផ្ដើមពីការងារតូចទាបដំបូងបំផុត​ រហូតក្លាយជាកំពូលអ្នកមាន និងកេរ្តិ៍ឈ្មោះល្បីល្បាញដូចសព្វថ្ងៃក្នុងនោះរួមមាន៖

១. ស្ថាបនិកក្រុមហ៊ុន Amazon លោក Jeff Bezos ចាប់ផ្ដើមពីបុគ្គលិកនៅក្នុងហាង Mcdonald’s មកទល់សព្វថ្ងៃជាមហាសេដ្ឋីលំដាប់ទី១ លើពិភពលោកដែលមានទ្រព្យសម្បត្តិសរុបចំនួន ១៥៣.៧២ ពាន់លានដុល្លារអាមេរិក។

២. មហាសេដ្ឋីលំដាប់ទី៤ លើពិភពលោក លោក Warren Buffett ចាប់ពីផ្ដើមពីអ្នក​រត់កាសែតតាមផ្ទះ រហូតក្លាយជានាយកប្រតិបត្តិក្រុមហ៊ុន Berkshire Hathaway ជាមួយនឹងទ្រព្យសម្បត្តិសុទ្ធ ៨៤.៨ ពាន់លានដុល្លារអាមេរិក។

៣. អតីតប្រធានាធិបតីអាមេរិក លោក Barack Obama ចាប់ផ្ដើមដំបូងជាបុគ្គលិកនៅហាងការ៉េម Baskin-Robbins រហូតក្លាយជាអ្នកនយោបាយ និងជាប់ឆ្នោតជាប្រធានាធិបតីអាមេរិកទី៤៤ និងជាជនជាតិអាមេរិកដើមកំណើតអាហ្រ្វិកដំបូងបង្អស់ដែលជាប់ឆ្នោត ក្នុងរយៈពេលពីរអាណត្តិគឺក្នុងឆ្នាំ ២០០៨ និង ២០១២។

៤. ស្ថាបនិកក្រុមហ៊ុន Apple លោក Steve Jobs ផ្ដើមចេញពីកម្មររោងចក្រ HP តស៊ូបង្កើតក្រុមហ៊ុន Apple ជួបប្រទះឧបសគ្គជាច្រើន ទម្រាំទទួលបានភាពល្បីល្បាញពាសពេញពិភពលោកនៅសព្វថ្ងៃនេះ។

៥. មហាសេដ្ឋី Jack Ma ផ្ដើមចេញពីអាជីពជាគ្រូបង្រៀនភាសាអង់គ្លេស ហើយទទួលបរាជ័យស្ទើរពេញមួយជីវិត ទម្រាំបង្កើតបានក្រុមហ៊ុន Alibaba។ លោក Jack Ma បានចូលនិវត្តន៍កាលពីដើមខែនេះជាមួយនឹងទឹកទ្រព្យសម្បត្តិសុទ្ធប្រមាណ ៣៦ ពាន់លានដុល្លារអាមេរិក។

អត្ថបទ៖ លីនី