យោងតាមការព្យាករណ៍របស់ក្រុមហ៊ុន Standard Chartered បានបង្ហាញថាប្រទេសវៀតណាមនឹងនៅតែជាប្រទេសអាស៊ានដែលមានកំណើនសេដ្ឋកិច្ចលឿនបំផុតក្នុងរយៈពេលដ៏ខ្លីខាងមុខនេះជាមួយនឹងកំណើនប្រចាំឆ្នាំ ២០១៩ មានចំនួន ៦.៩% ។ ហើយវិស័យផលិតកម្មដែលជំរុញដោយ FDI ដែលកំពុងត្រៀមខ្លួនសម្រាប់ការកើនឡើងទ្វេដងក្នុងរយៈពេល ៤ ឆ្នាំជាប់គ្នានឹងបន្តក្លាយជាកម្លាំងជំរុញដ៏សំខាន់។ ការព្យាករណ៍នេះត្រូវបានគូសបញ្ជាក់នៅក្នុងរបាយការណ៍របស់ពិភពលោកដែលបានចេញផ្សាយដោយផ្អែកលើសេដ្ឋកិច្ចនៅក្នុងត្រីមាសទី៣ ឆ្នាំ ២០១៩ មានចំណងជើងថា “The dovish wave grows” ។

លោក Chidu Narayanan សេដ្ឋវិទូប្រចាំអាស៊ីនៅធនាគារ Standard Chartered បានមានប្រសាសន៍ថា “ ទស្សនវិស័យកំណើនសេដ្ឋកិច្ចរបស់ប្រទេសវៀតណាមនៅតែមានភាពរឹងមាំជាមួយនឹងស្ថានភាពម៉ាក្រូសេដ្ឋកិច្ចមានស្ថេរភាពនៅឆមាសទី១ ដែលទំនងជាបន្តដល់ដំណាច់ឆ្នាំនេះ ហើយយើងរំពឹងថាកំណើននឹងកើនឡើងយឺតនៅឆមាសទី២ ពី ៦.៧% នៅក្នុងឆមាសទី១ ”។ ជាមួយគ្នានេះលំហូរចូល FDI នឹងនៅតែរឹងមាំនៅឆ្នាំនេះជាពិសេសក្នុងវិស័យផលិតកម្មដែលមានចំនួនសរុប ១៨ ពាន់លានដុល្លារ ហើយកំណើននាំចេញរបស់វៀតណាមទំនងជានឹងនៅថេរ និងល្អជាងប្រទេសជិតខាងនេះបើយោងតាម​ការស្រាវជ្រាវម៉ាក្រូសេដ្ឋកិច្ចចុងក្រោយ។

ការនាំចេញគ្រឿងអេឡិចត្រូនិកដែលមានចំនួនប្រហែលមួយភាគបីនៃចំនួនសរុបទំនងជាមានចំនួនតិចជាងប៉ុន្មានឆ្នាំចុងក្រោយនេះ ដោយសារតែការធ្លាក់ចុះតម្រូវការខាងក្រៅ និងតម្លៃទាប។ ការធ្វើឱ្យប្រសើរឡើងនូវការនាំចេញតាមផលិតផលក្នុងស្រុកដូចជា វាយនភ័ណ្ឌ និងកសិកម្មអាចនឹងបន្តនូវការនាំចេញយឺតយ៉ាវក្នុងទំហំតូចមួយ​ ហើយកំណើននៃការនាំចូលត្រូវបានគេរំពឹងថាអាចឈានទៅដល់ ១០% លើការថយចុះនៃការនាំចូលទំនិញមូលធនដែលគួរតែរក្សាតុល្យភាពពាណិជ្ជកម្មឆ្នាំ ២០១៩ ឱ្យនៅតែមានកំណើន។

ការសិក្សាក៏បានបង្ហាញផងដែរថាធនាគាររដ្ឋនៃប្រទេសវៀតណាមនឹងនៅតែមានភាពងាយស្រួលក្នុងរយៈពេលដ៏ខ្លីដើម្បីគាំទ្រដល់កំណើន ខណៈអតិផរណានៅតែមានកម្រិតល្មមគ្រប់គ្រាន់។ ធនាគារ Standard Chartered ព្យាករថាអតិផរណានឹងកើនឡើងតិចតួចនៅឆមសទី២ ជាមធ្យម ២.៨% ធៀបនឹង ២.៦% នៅឆមាសទីមួយ និងអតិផរណាស្នូលដែលមិនរាប់បញ្ចូលតម្លៃអាហារ ថាមពល សុខភាព និងការអប់រំនឹងឈានដល់កម្រិតខ្ពស់បំផុតដោយនឹងកើន ២% សម្រាប់ឆ្នាំនេះ៕

អត្ថបទ៖ លីនី