អ៊ីតាលី៖ ក្រុមហ៊ុនបច្ចេកវិទ្យាដ៏ធំរបស់ចិន Huawei នឹងវិនិយោគទឹកប្រាក់ចំនួន ៣,១ ពាន់លានដុល្លារ នៅប្រទេសអ៊ីតាលីក្នុងរយៈពេល ៣ឆ្នាំខាងមុខនេះ ខណៈក្រុមហ៊ុនទូរគមនាគមន៍ចិនអំពាវនាវឱ្យទីក្រុងរ៉ូម ធានាចំពោះ ការប្រើប្រាស់អំណាចរបស់ខ្លួនលើការអភិវឌ្ឍបណ្តាញ 5G ដោយមានតម្លាភាព ប្រសិទ្ធភាព និងយុត្តិធម៌។ អគ្គនាយកក្រុមហ៊ុន Huawei ក្នុងប្រទេសអ៊ីតាលីលោក Thomas Miao បានថ្លែងនៅក្នុងពិធីមួយកាលពីម្សិលមិញថា អំណាចរបស់ប្រទេសអ៊ីតាលីបានអនុញ្ញាតឲ្យរដ្ឋទាំងអស់ ជួយសម្របសម្រួល ក្នុងវិស័យឯកជន ដើម្បីការពារសន្តិសុខជាតិ ហើយគួរតែត្រូវបានពង្រីកដល់អ្នកជំនួញទាំងអស់នៅ នៅសហភាពអឺរ៉ុប។

ជាមួយគ្នានេះដែរប្រភពរដ្ឋាភិបាលមួយក៏បានប្រាប់ឲ្យដឹងផងដែរថា កាលពីពេលថ្មីៗនេះ ប្រទេសអ៊ីតាលី បានបង្កើនវិធានការមួយផ្នែក ដោយសារតែការព្រួយបារម្ភជុំវិញការចូលមកវិនិយោគរបស់ក្រុមហ៊ុន Huawei និងក្រុមហ៊ុនចិន ZTE Corp ក្នុងការអភិវឌ្ឍបណ្តាញ 5G ។ លោក Thomas Miao បាននិយាយថាក្រុមហ៊ុន Huawei នឹងបន្ថែមការងារចំនួន ១,០០០ កន្លែងនៅក្នុងប្រទេសក្នុងរយៈពេលបីឆ្នាំខាងមុខនេះ។ លោកក៏បានបញ្ជាក់ផងដែរថាក្រុមហ៊ុនចិននេះ នឹងកាត់បន្ថយការងារចំនួន ១០០០ កន្លែងនៅក្នុងសហរដ្ឋអាមេរិក ប្រសិនបើក្រុមហ៊ុននេះនៅតែស្ថិតក្នុងបញ្ជីខ្មៅរបស់ទីក្រុងវ៉ាស៊ីនតោន នៅខែសីហាខាងមុខនេះ ដោយសារក្រុមហ៊ុន Huawei មាន “ផែនការ B” ដើម្បីធានាការផ្គត់ផ្គង់គ្រឿងបន្លាស់។

បន្ថែមពីនេះ សហរដ្ឋអាមេរិកបានបញ្ចុះបញ្ចូលប្រទេសអ៊ីតាលី និងសម្ព័ន្ធមិត្តអ៉ឺរ៉ុបដទៃទៀត ដើម្បីចៀសវាងការប្រើប្រាស់សម្ភារៈរបស់ក្រុមហ៊ុន Huawei និង ដើម្បីត្រួតពិនិត្យយ៉ាងយកចិត្តទុកដាក់លើក្រុមហ៊ុន ZTE ដោយចោទប្រកាន់ថាអាចបង្កឱ្យមានហានិភ័យផ្នែកសុវត្ថិភាព។ ប៉ុន្តែក្រុមហ៊ុនទាំងពីរបានបដិសេធយ៉ាងដាច់ខាតចំពោះហានិភ័យបែបនេះ។ ទោះបីជាយ៉ាងណាក៏ដោយក្រុមហ៊ុនទូរគមនាគមន៍ Italia និង Vodafone Italia ត្រូវបានគេរំពឹងថា នឹងបញ្ចប់កិច្ចព្រមព្រៀងក្នុងការបង្កើតហេដ្ឋារចនាសម្ព័ន្ធ 5G រួមគ្នានៅក្នុងប្រទេសអ៉ីតាលី ហើយក្រុមហ៊ុនទាំងពីរកំពុងរង់ចាំបញ្ញតិ្តដើម្បីសម្រេចចិត្តដោះស្រាយជាមួយដៃគូចិនដូចជាក្រុមហ៊ុន Huawei ៕

អត្ថបទ៖ លីនី